nga giunhan sa mga tawo nga nanagsul-ob mga saput sa pantasma nga makapalisang sa mga bata, busa madungog ta ang ilang mga hilak ug mga tiyabaw. Apan sa taliwala niadtong daghang mga "hábito", mga pandong, mga bakús ug mga dungdong sa ulo ug sa mga yagungyong sa tingog sa mga tigulang babaye nga nangadye, sama sa maputi ug mahamis nga bulak sa hasmín ug sampaga nga gilimis sa mga nuóg nga bulingón, makita ta ang napulóg-duha ka mga batang babaye nga nanagsul-ob mga sapút nga lubus maputi, pinurongpurongàn ug mga
bulak, pinakulong ang buhok ug nagkasigá ang ilang mga tinan-awán sama sa ilang mga kuwintas, daw mga gagmayng diyos-diyos sa kahayag nga gipanakop ug gipanlambing sa mga pantasma. Nanaggunit silá sa duhá ka dagkung tinabas nga tagumon nga gihigot sa "carro" sa Birhen, ug kini makapahinumdom kanato sa mga salampati nga nanagguyod sa “carro” sa Primavera.
Ang tanang mga larawan nga nanghunong ug nanagdip-igáy, andam na sa pagpamati sa mga balak; ang mga mata sa tanan didto magsamot tan-aw sa tabil nga nagtingabngab. Sa katapusan gikan sa tanang mga baba nadungog ang usa ka aaah! nga nagpasabut sa ilang kalipay ug kahitingala.
Angayán gayud tuod nga ikalipay ug ikatingala ang ilang nakita: maoy usá ka batan-on nga dili pa hingkod nga gitauran ug mga pako, nagapolaynas, nagabanda, nagabakús ug nagalukdo usá ka kalo dinayandayanan ug balhibo sa lamggam.
— Ang senyor Alkalde Mayor! -misinggit ang usa ka tawo.
Apan ang batan-on nga gikahibulongan sa mga tawo wala mahimangód nga gipananglit siya sa Alkalde ug misugod dayon pagyamyam sa balak nga iyang sinag-u'o, balak nga, sama sa iyang panagway, walay usá nga nakasabút.
Nganong at-aton pa man nato dinhi ang giyamyam nga linatin, tinaga óg ug kinatsila nga binalak niadtong alaut nga batan-on nga gibinuangan sa "Gobernadorcillo"? Ang among mga magbabasa nanagpakatagamtam na sa wali ni pari Dámaso ganina sa buntag ug dili kami buút nga sum-ulán silá sa daghan nang mga katingalahan, ug labut pa tingali ang maong paring pransiskano masuko kanamo kay abi na unya niya giindigan
