nang pagkatawa nga mabiaybiayon, apan sa hinayhinay mikisdum ang iyang nawong, naminaw pag-ayo, unya mikusmod ug daw mihinuktók. Ang tingog sa buang, ang kahulogan sa mga balak ug ang maong awit nakapahinuklog kaniya: ang kasing-kasing uga ug matig-a niadtong babayhana dagway giuhaw sa malumong mga pagbati. Siya nakasabut kaayo niadto: "Ang kasubo, ang katugnaw ug ang tun-og nga manaug gikan sa langit linimisan sa kangitngit sa kagabhion" nga giasoy sa mga balak sa Kundiman, gipakaingon niya nga mikunsad usab sa
kahiladman sa iyang kasingkasing: ang bulak nga lawós ug laya
na nga sa adlaw pa nagapatuod sa iyang katahum, uhaw sa mga
dalayeg ug hupong sa kamapahitas-on, sa pagkasalop sa Adlaw,
human magabasul ug moilá sa iyang sayop, ang iyang mga giháy nga gum-os nakigbisog gayud pagtuybo ug paghangad sa langit aron pagpangayo diyutay nga landong nga sarang niya katagoan diin siya buut magpakamatay nga dili bugalbugalan sa kahayag nga nakakita kaniya sa panahon nga siya puno pa sa kabantug ug wala lamang makasabut sa pagkawalay-dapat sa iyang kamapahitas-on; nagpakilimus usab siyà diyutayng tunog nga sarang makabisibis kaniya. Ang langgam sa kagabhion mobiya sa iyang mamingaw nga pinuy-anan nga mao ang boho sa usa ka dakung kahoy, motugaw sa masulub-ong kahilum sa kagulangan..."
—Ayaw, ayaw na pag-awit!-misinggit ang asawa sa "Alferez" sa tinagalog nga maayo kaayong pagkasulti, ug mitindog nga nag-alindasay;— ayaw na pag-awit kay makaguol kanako kanang mga balak!
Ang buang mihilum; ang mutsatso nahinayak pag-ingon: "abá, mahibaló man diay siyang motinagalog!", ug nagsamot hinan-aw kang Donya Consolación puno sa kahibulong.
Ang asawa sa "Alferez" nakasabut nga nahaligás siya; giabut ug kaulaw, ug, sanglit ang iyang kinaiya dili man sama sa ubang babaye, ang kaulaw nga iyang gibati nahimong kalagót ug kasilag. Gipagula niya ang walay buót nga mutsatso ug unya sa usa ka patid gitakpán niya ang ganghaan. Misuroy-suroy makadiyot sulod sa lawak nagabitbit sa pudlos, ug, human mokalít paghunong sa atubangan sa buang, kini iyang gikinatsilaan pag-ingon: Baila!
Si Sisa wala molihok.
