May a las dies na kaha kadto sa gabii. Ang katapusang mga kuwitis nga daw gipangapuyan na, misulbong sa kapanganuran diin nagkasiga ang mga lobo nga papel nga dili pa dugay nanglupad salamat sa aso ug hangin nga giinit ug gisulod. Pipila ka lobo nga dinayandayanan ug mga kastilyo nangasunog sa itaas ug gikahadlokan nga mahiangin ang kabalayan sa ubus, busa sa ibubungan sa mga balay aduna gihapon ingmga tawo nga nanagdala tag-as mga kiwis-kiwis nga ginairan sa tumoy ug panapton nga hinumod ug sangkap sa usa ka lata nga puno sa tubig. Ang mga lobo nga nanagdagtum maila kaayo taliwala sa maalop nga kahayag sa langit, daw mga pantasma nga nangunsad gikan sa kahitas-an aron pagtambong sa paglipay sa mga tawo. — Aduna usab ing gisilaban nga daghan uyamut mga ligid nga patuyoktuyukon, mga kastilyo, mga baka kun kalabaw nga kalayo ug usa ka dakung bolkan nga milabaw sa katahum ug kadaku sa tanang mga bolkan nga hangtud niadtong mga adlawa nakita sa mga molupyo sa lungsod sa San Diego.
Karon, ang mga tawo napadulong na ngadto sa sawang sa lungsod aron pagtan-aw sa katapusang dula. Bisag asa ka molingi, makita mo ang daghang mga suga nga benggala nga nagadan-ag sa ilang matahum kahayag sa mga malipayong pundok sa nanan-aw sa dula; ang mga bata nanagsulo aron pagpangita sa kabalilin-an mga bomba nga wala mobuto ug ubang mga salin nga magawi pa, apan ang banda sa musika mitugtog aron pagpahibalo nga ang dula sugdan na ug ang mga bata namiya dayon sa kabalilin-an.
Ang dakung intablado mahayag uyamut: libo ka libo ka mga suga nanaglibot sa mga haligi, gipamitay sa atop ug gipangatag sa salog. Usa ka algwasil maoy na:igabantay niadtong mga suga, ug kon ang maong algwasil magaayo na ngani sa mga
