suga nga hapit na mangapalong, suliyawan ug siyagitan pagingon: "Anaa, anaa na!"
Sa atubangan sa intablado, ang orkista nagaangay sa mga tulunggon, nagaasoy-asoy sa mga sonata; luyó sa orkista didto mahimutang ang dapit nga gihisgotan sa iyang sulat sa tinugyanan sa usa ka mantalaan. Ang kadagkuan sa lungsod, ang mga Katsila ug ang mga dumuduóng nanag-anam pagpanglingkod sa mga siya. Ang lungsod, ang mga tawo nga timawa, didto managtapok sa putol sa sawang; pipilá ka buók nanagpas-an mga bangko nga inay lingkoran ila hinuon nga gitungtongan: kining buhata nakapasuko sa mga nanan-aw nga walay bangko, busa ang nanghiuná manganaug dihadiha, apan mamalik usab dayon pagpanaká sama lamang sa walay nahitabo.
Ngadto-nganhi sa mga tawo, mga singgit, mga tuwaw, mga talidhay, usa ka "buscapiés" nga wala mobutó dayon, usa ka rebentador, makadugang sa kaalingasa sa mga tawo. Dinhi, usa ka bangko kabalian sa tiil ug, inubanan sa mga kagiki sa kadaghanan, mangahulog sa yuta mga tawo nga gikan sa layóng dapít nanganhi aron pagtan-aw ug karon mao na hinuon ang gitan-aw sa kadaghanan; didto sa unahan adunay nanag-away ug nanag-ilog sa luna; sa unahan pa gayud nabati ang lugan-ay sa mga kopa ug botilya nga nangabuák: mao si Andeng nga nagadalá mga matam-is ug mga ilimnon: nagsapwang siya sa usa ka halapad nga dalitán, apan gihibalag sa iyang hinigugma nga buut magpahimulos sa iyang pagkagukam. . .
Ang "Teniente mayor" nga si Don Filipo maoy nangulo niadtong talan-awon, kay ang "gobernadorcillo" mahigugmaon man sa monte. Si Don Filipo nakigsulti sa tigulang pilosopo Tasyo.
—Unsay may akong mahimo? —matud niya; —walà dawata sa Alkalde ang pagluwat ko sa katungdanan. "Wala ba ikaw ing kusog nga igo aron pagtuman sa imong katungdanan?"—iya akong gipangutana.
—Nan, unsa may gitubag mo?
—Gitubag ko siya pag-ingon: Ginoo Alkalde, ang kusóg sa usa ka "teniente mayor", bisan unsa ka diyutay, samag bili sa kusog sa tanang punoan: kanang kusogá gikan gihapon sa itaas. Ang kusóg ug gahum sa maong Hari nadawat niya sa lungsod ug ang lungsod didto usab kakadawát kang Bathala.
