—Ngano man? —nangutana ang "Teniente mayor" nga nahitingala.
—Kay ang "Alferez" ug ang sinyora nagsumbagay ug dili sila manghikatulog.
—Ingna ang "Alferez" nga kami adunay pananghid sa Alkalde Mayor, ug dinhi sa lungsod walay tawo nga may kagahum sa pagsupak niining pananghid, bisan ang "gobernadorcillo", nga maoy bugtong la-baw na-kong pu-no-an!
—Apan kinahanglan gayud nga hunungon ang dula! —mibalik pagsulti ang mga sundalo.
Si Don Filipo mitalikod kanila. Ang mga sibíl nanglakaw. Aron dili magubut, si Don Filipo wala magsaba sa lain mabitungud sa nahitabo.
Sa pagkahuman niadtong bahin sa dula nga gipakpakan pagayo, migula si Prinsipe Villardo nga mihagit sa pakig-away batok sa tanang mga moros nga nagabilanggo sa iyang amahan; ang maisug prinsipe namulong gayud nga sa usá lamang niya ka tigbás iyang pamutlan sa ulo ang tanang mga moros ug unya ang mga ulo iyang ipadala ngadto sa Bulan. Ang mga moros andam na unta sa pakig-away dinuyogan sa honi sa himno de Riego, maayo ngani kay niadtong higayona nagubút ang mga tawo. Ang mga musiko sa orkista mikalit paghunong ug nanglukso ngadto sa intablado, dungan ang pagsalibáy sa ilang mga tulunggon. Ang maisug Villardo nga wala magpaabut kanila, abi kaha niya mga sagabay sa mga moros ang mihasmag kaniya, midalagan usab ug gisalibay ang iyang sable ug taming; sa pagkakita sa mga moros nga ang maisug kristiyanos midalagan man ngani, nanig-ingon usab sila: nabati ang mga singgit, mga agulo, mga balikas, mga panghimaraut, midalagan ang mga tao, nagkabangga sila, napalong ang mga suga, adunay misulhong mga lamparahan nga sinug-an, ubp. —Mga tulisan! mga tulisan! —naniyagit usab ang pipilá ka tawo; mga babaye ug mga bata nanghilak, nangatuali sa yuta ang mga bangko ug mga tawo taliwala sa labihang kaguliyang ug kabanha.
Unsay nahitabo?
Ang mga musiko gigukod diay sa duha ka sibíl nga nanagbitbit ug ulisi aron lamang mahunong ang dula; bisan nanukol ang mga sibíl, gipanakóp gayud sa "Teniente mayor” nga inubanán sa mga kwadrilyero nga sangkap sa mga sableng karaan.
