—Mao da diay kana? Yamat nga tinagoana!— matud ni Sinang sa hataas nga tingog ug sa sinultihan sa usa ka usurero nga gitikasan;— gipakaingon ko kadto...
—Bantay baya! Dili ako buut nga isangyaw mo kana!
—Walay kinahanglan, undo, nga imo akong pinahan!— mitubag si Sinang nga mikimod sa iyang ilong.— Kon hinungdanon pa kana, itaho ko unta sa akong mga higala; apan ang pagpalit ug mga lubi!... kinsay magtagad sa mga lubi?
Ug midali paglakaw aron pagpangita sa iyang mga higala.
Taudtaud si Ibarra nanamilit sa pagtan-aw nga ang tigum nagkaluya na. Si Kapitan Tiyago nagkulima daw nakakaog sambag, si Linares nagpakahilum ug naminaw, ug ang kura nga nagpakamalipayon nagahisgot mga butang kahibulongan. Sa mga dalaga walay usa nga mibalik pagpakita.
-437-
