—Unsaon paghimo nga ako wala man ngani makaila kaniya?
—Giilaila mo unta siyang daan!
—Apan, Tinchang, si mao pa kadtoy pagpakakita ko kaniya, mao pay pagkabati ko sa iyang ngalan!
—Kinahanglan nakakita ka na untang daan kaniya ug nakabati sa iyang ngalan; alang niana, ikaw lalaking buhat, nagkalsonis ka ug nagsamot ug basa sa El Diario de Manila!— mitubag nga wala gayud papiug ang iyang asawa ug gisigaan siya sa mata. Si Kapitan Tinong wala makatultol unsay iyang itubag.
Wala matagbaw niadtong iyang pagdaug, buut pa gayud ni Kapitana Tinchay pakaulawan ang iyang bana, ug human moduol niini nga nangumo, miingon:
—Alang niana naghago ug nagdaginot ako sulod sa daghang katuigan aron ang bunga sa akong mga kabudlay mausik tungud lamang sa imong pagkakuwanggol? Karon walay duhaduha hinginlan ikaw ug dad-on sa halayo. sakmitan kita sa atong mga butang, sama sa asawa sa... Oh, kon ak6 lalaki, kon ako lalaki pa lamang unta!
Ug sa pagtan-aw niya nga ang iyang bana miduko, mibalik paghingos apan nagkanayon gihapon:
—Ay, kon lalaki, kon lalaki pa gayud unta ako!
—Nan, kon lalaki pa ikaw, unsa man untay buhaton mo?— nangutana ang bana nga naglagot na.
—Kon lalaki pa ako? . . . Karonkaron dayon moatubang ako sa Kapitan Heneral ug mohagad pagsulod sa pagkasundalo aron makig-away batok sa nanagpangalsa. Oo, karon dayon!
—Apan wala ka ba ug6d makabasa mining gimantala sa El Diario? Basaha ngani! “Ang talamayon ug makauulaw nga pagbudhi gisumpo sa dakung kaisgot, kusog ug kabaskog, ug dili madugay ang nanukol nga mga kaaway sa Yutang-Natawhan, ingon man ang ilang mga kauban nga nanagtago, pahamtangan sa kabug-at ug kahagip-ot sa balaod..Nakita mo? Karon wala nay kagubut.
—Walay, sapayan, kinahanglan moatubang ka gayud didto sama sa gibuhat sa uban sa tuig 1872, ug naluwas sila.
—Oo! Mao man usab bitaw kana ang gihimo ni pari Burg...
