Ug maó kadto nga sa pagka a las otso ang takna sa gabii
sa sunod adlaw, ang baláy ni Kapitán Tiyago gipunsisokan na
usáb sa mga tawo, ugaling kay niining higayona ang iyang
mga dinapit lonlon da mga Katsila ug mga Insik; didtoy mga
babayeng Katsila nga nangatawo sa Espanya ug pipilá usáb nga
nangatawo sa Pilipinas.
Atua didto ang kadaghanan sa atong mga kaila: si pari Sibyla, si pari Salví ubán sa pipilá ka mga pransiskano ug mga dominiko; ang tigulang tenyente sa Guardia Civil, ginoo Guevara, kansang nawong misamót pagbungiut; ang Alferez nga makalibo na magbalikbalik pagsugilon sa iyang pakig-away batok sa nanagpangalsa, kinsa, sa iyang pagtuo nga nahisama siyá kang Don Juan de Austria, motan-aw nga daw maluoy sa tanang namati kaniya nga walá intawon makahimo sa iyang nabuhat; karón teniente-comandante na siyá; didto nakita usáb si De Espadaña nga motan-aw sa Alferez sa dakúng pagtahud ug kahadlok ug molingíw kon tan-awon niini; si Donya Victorina naglagut pag-ayo. Si Linares walá pa moabút, kay, sanglit niadtong higayona siyá maó man ang ginahulát sa tanán, kinahanglan magpaulahí pag-abút sa ubán: adunay mga tawong uyóg ug ulo nga nanagtuo nga mangahimo na siláng dagkung-tawo kon mopaulahíg usá ka takna sa tanáng mga buluhatón.
Sa pundok sa mga babaye, si María Clara maóy giutasag libák: ang pagyukbo sa dalaga kanila dili kaayo mahinalangpon ni makisanduroton ug sa iyang panagway walá gayúd mapala ang kasubó.
—Psh —matud sa usá ka dalagang batan-on;—mapahitas-on uróy kanáng babayhana!...
—Maarang-arang siyág dagway, apan maayo untá kadto nga si Linares nagpilig pangasaw-on nga dili kaayo buróng sumala sa mabasa sa nawóng nianang dalagaha.
—Ang malingin, higala; baligya na man ugód karón ang ulitawong maayo.
Sa laing pundok ang sultisulti maó kiní:
—Magminyo siyá sa lain samtang ang una niyang pamanhonón hapit na bitayon!
—Kaná maóy tawgon kog buhat nga mabuot; may inandam diáy siyang pamanhonón nga ig-iilís.
—Nan, kon mabalo unya siya...
