Kiníng mga sultisulti dagway nangabút sa dalunggan sa
dalaga nga nagalingkod sa usa ka siyá ug nagahikay sa mga
bulak nga hinapnig sa usá ka bandiha, kay nagpanguróg man
ang iyang mga kamót, naluspad siyá ug nagpangitlib sa ngabil.
Sa alirong sa mga lalaki, ang ilang panagsulti gihimo sa hataás nga tingog ug, sumala sa masabút na, nanaghisgot silá sa katapusang mga hitabó. Nanulti ang tanán, hangtud si Don Tiburcio, gawás kang pari Sibyla nga nagpakahilúm lamang daw walá layhing nakigkulokabildo sa iyang mga kauban didto.
—Matuod ba, pari Salvi ang akong hidunggan nga ikaw konó mobiya sa lungsod sa San Diego?— nangutana ang bag-ong tenyente nga nagmaabiabihon na tungúd sa iyang estrella.
—Walá na akoy buhaton didto; anhi na ako mopuyó sa Manila... ug ikaw?
—Mobiya usáb ako didto— mitubág ang bag-ong tenyente nga mitikíg; gikinahanglan akó sa Kagamhanan arón maóy magmando sa usá ka panón nga sundalo nga manakóp ug maóy mopúo sa mga pilibustiro sa mga lalawigan.
Gisud-ong siya ni pari Sibyla gikan sa tiíl hangtud sa ulo ug unya gitalikdan sa lahus.
—Natino na ba gayúd kon unsaon ang pulongpangulo sa nangalsa? —nangutana ang usa ka kawani.
—Si Crisóstomo Ibarra ba maóy gipasabút mo?— misuna ang usá.— Ang atong mabanabana ug ang labí usáb nga makatarunganon maó nga siyá bitayon sama niadtong nangalsa sa tuig 1872.
—Idistiyerro siyá! —matud sa tigulang tenyente sa sinultihán nga ugá kaayo.
—Idistiyerro!Idistiyerro lamang siyá! Apan dagway dili na gayúd siya pabalikon nganhi hangtud sa hangtud!— nanagdungan pagsulti ang pipila ka tawo.
—Kon kanang batan-ona— mipadayon si tenyente Guevarra sa hataás ug maugdang sinultihán— nagabantay pa unta pagayo: kon wala pa unta mosalig kaayo sa pipilá ka tawo nga nakigsulatay kaniya; kon ang atong mga piskal dili pa kaayo
kutikutihan nga mosabút pa sa kahulogan sa mga sinulát; ka-
