ug misugod pagtabako sa ampiyon. Dili na siya moadto sa Antipolo ni mopadala pag mga pamisa; si Donya Patrocinio, ang tigulang kaindig niya sa paghalad sa mga larawan, nagasaulog sa iyang pagdaug pinaagi sa paghagok sulod sa simbahan samtang magawali ang pari. Kon sa kapulihay, inigkasalumsom, kamo managsuroysuroy sa dalan sa Santo Cristo, inyong makita nga magalingkod sa tindahan sa usa ka Insik ang usa ka tawong diyutayon, madalag ang panit, maniwang, tikuko, nanghilawom ang mga mata nga katulugon, mga ngabil ug mga kuko nga mahugaw, nagasud-ong daw wala makakita sa mga tawo. Inigabut sa kagabhion, makita siya ninyo ang mag-unanot pagtindog,ug, manukod sa iyang sungkod, molakaw padulong sa usa ka masigpit nga likoanan, mosulod sa usa ka gamayng balay nga
mahugaw, diin ibabaw sa iyang ganghaan, sinulat sa dagkung mga titik mapula, mabasa kining mga pulong: TABAK-ANAN SA AMPIYON ALANG SA KADAGHANAN. Kining tawhana mao kadtong kanhi bantugan nga Kapitan Tiyago, nga karon hikalimtan na lamang lahus sa tanan, hangtud sa sakristan mayor.
Sa tagabong pinakulong ug sa sinultihang sinunod sa mga andaluz, gidugang ni Donya Victorina ang bag-ong batasan sa pagpangunay pagpamilino sa iyang salakyanan, batasan nga nakapilit kang Don Tiburcio sa pagpalingkoay ug pagligdong tupad sa iyang asawa. Sanglit daghang mga kadaut nga nanghitabo tungud sa kaluya na sa iyang panan-aw, si Donya Victorina nagataud na karon ug antohos nga walay sangitanan sa dalunggan (quevedo) nga nakahatag kabantug sa iyang panagway.Ang doktor wala na tawga aron patambalon; sa daghang mga adlaw sa semana, makita sa mga binatonan nga siya mapangag, tilimad-on kini nga mangil-ad uyamut, sumala sa hisayran na sa among mga magbabasa.
Si Linares, nga maoy bugtong manlalaban sa alaut nga doktor, dugay na nga mipahulay sa kalubngan sa Paco, namatay sa utol ug sa mga palabilabi sa iyang bayaw nga si Donya Victorina.
Ang mananaug nga Alferez mipauli sa Espanya, teniente-comandante na, ug gibiyaan niya ang iyang asawa nga nagasul-ob gihapon sa sininang pranila kansang bulok dili na maila. Ang alaut nga Donya Consolacion, diha nga gibiyaan na sa iyang
