ibubongan sa atop, pinataas ang mga bukton ug hinangad ang nawong sa langit, daw nagpakitabang kang Bathala. Ang langit mitubag kaniya, pinaagi sa mga linti ug mga dalugdog!
Sa pagkahilum sa dalugdog, nabati usa ka masulub-on nga panghayhay.
—Dili hinaganas sa hangin, ang pantasma karon nga nagagulo!— matud sa sundalong karaan agig tubag sa pig-it sa kamot sa iyang kauban.
—Ay! ay!— nagkanayon ang pantasma kansang tingog milutaw gayud sa hinaganas sa ulan: ang hinagiyos sa hangin wala makatabon niadtong tingog nga matam-is ug masulub-on, hupong sa kaguol.
Mikidlap na usab laing kilat kansang kasiga daw makabuta. —Dili, dili kana pantasma!— matud sa sundalong karaan;— nakita ko siya pag-usab; matahum sama sa Birhen . . . Talana, ug pahibaludn ta ang atong punoan! Ang rikulota minunot dayon ug dihadiha nanglakaw silang duha.
Kinsa ang nag-agulo taliwala sa kagabhion bisan nagaulan, nagahangin ug nagalinti? Kinsang monghaa, asawa ni Hesukristo, ang nagapabati sa iyang mga agulo kang Bathala sukad sa ibubongan sa usa ka atop, taliwala sa kagabhion ug sa higayon nga ang Kinaiyahan nagpadayag sa iyang kapungot pinaagi sa un6s, sa mga kilat, mga linti ug dalugdog? Mibiya na ba kaha ang Ginoo sa alampoanan sa kombinto sa mga mongha ug dili na mamati sa mga pangilaba? Alihan ba kaha sa mga paril ug atop sa kombinto ang mga pag-ampo didto aron dili moabut ngadto sa langit, sa tiilan sa lingkoranan sa Maluluy-on uyamut?
Ang unos mipadayon paghuros sa hapit tibuok gabii; sulod sa kagabhion walay misubang bisan usa ka bituon; ang mga panghayhay nga nahisagol sa kasaba sa hangin nagapadayon usab, apan ang Kinaiyahan ug ang katawhan wala mamati niadto: si Bathala nagatabil ug wala makadungog.
Sa pagkaugma, diha nga sa langit nga wala nay dag-um mibalik na usab pagsidlak ang Adlaw, usa ka salakyanan mihunong tungod sa ganghaan sa kombinto sa Santa Clara ug mikawas ang usa ka tawo, kinsa nagpaila nga tinugyanan sa Labawng Puno-
