- 111
Anum ka kamot kag duha ka tudlo! Kag ang tagsa ka tudlo pesos, — kumod niya sang ulihe nga nanumdom. — Kag ang tagsa ka pesos... pila ka sikapat?
— Isa ka gatos kag kan-uman.
— Isa ka gatos kag kan-uman ka sikapat? Isa ka gatos kag kan-uman ka pilu ang sikapat? Iloy ko! Kag pila ang isa ka gatos kag kan-uman?
— Katloan kag duha ka kamot. — Sabat sang magulang. Si Crispin dumulog sing makadali nga tinulok niya ang iya magagmay nga mga kamot.
— Katloan kag duha ka kamot! — Sulit niya. — Anum ka kamot kag duha ka tudlo... kag ang tagsa ka tudlo katloan kag duha ka kamot... kag ang tagsa ka tudlo isa ka sikapat... iloy ko, pila nga mga sinikapat! Wala sing makaisip sina sa tatlo ka adlaw... kag sarang mabakal sing tsinilas sa mga tiil, kag kalu sa ulo kon mainit ang adlaw, kag isa ka daku nga payong kon mag-ulan, kag mga pagkaon, kag mga bayu sa imo kag kay Nanay kag...
— Pumadalom sang iya isip si Crispin.
— Karon nagakasubo ako nga wala ako magpangawat!
— Crispin! — Saway sang magulang.
— Indi ka magpangakig! Ang pari nagsiling nga patyon niya ako sang hanot kon indi makita ang kwarta; kon abi kinawat ko yadto, sarang ko mapakita. .. kag kon mapatay ako, mahatagan ko man ikaw kag si nanay sing mga panapton! Kuntani kinawat ko na gid yadto!
Ang magulang humipos kag pinitik niya ang iya lubid. Sang ulihe sumabat nga guminhawa:
— Ang ginakatahapan ko nga maakig si nanay sa imo, kon ina masayran niya.
— Ginapatihan mo ina? — Pamangkot sang diutay nga natingala. — Isugid mo nga madamo na nga hanot nila sa akon, ipakita ko sa iya ang akon mga labhag, kag ang nagkagisi ko nga mga bolsa. Wala na ako kundi isa lamang ka sikapat nga hinatag nila sa akon sang Paskwa, kag kinuha yadto sa akon sang pari kahapon.. .wala na ako’y nakita nga sikapat nga labi pa katahum. Indi ina pagpatihon ni nanay, indi sia magpati!
— Abi kon isugid sang pari...
Nagsugod si Crispin sa paghibi nga naghimulungon sa iya paghibubun-ot:
