- Ang timawa pakok kag gani nagabayad¹,
- Matarong hambalán pinatok sunô sa iya
- luyag.
- -Lope De Vega-
ANG LINAW, nga ginalibután sang iya kabukiran, nagakatulóg sing malinóng nga may pagpakunokuno sang mga kinaugali, katulad abi nga sang gab-i nga nagligad walâ siá magpahilabót sa bagyo. Sa nahauná nga mga silak sang kasanag nga nagpukaw sang may hamag nga mga kabuhì sa mga tubig, nabanhay sa malayô, halos sa sidsid sang gindut-an, ang kayumanggi nga mga landong: mga baroto sang mga mangingisdà nga nagalas sang sinsuro; mga kasko kag mga paráw nga naghulomlad sang ila mga layag.
Duhá ka tawo, nga nagpalanapót sing lunsay itúm, nagtamód sing mahipos sa tubig kutob sa ila gintindugán nga mataas; ang isá sa ila si Ibarra kag ang isá pamatan-on nga may dagway nga mapainubuson kag may pangguyahon nga masulub-on.
—Dirí siní! —siling sining' naulihé,— diri ginhulog ang bangkay sang imo amáy. Dirí kamí ni tenyente Guevarra kag akó gindul-ong sang sepulturero!
Hinugot ni Ibarra sing maayo ang kamót sang pamatan-on.
— Wala ka sing dumdumón sinâ nga kabalaslan! —Sabát siní.— Nakautang ako sing madamò nga kabalaslan sa imo amáy kag ang nahimò ko lamang sa iya amo ang pagbuylog sa iya sa lulobngan. Nagkari akó nga walâ sing may nakilala, wala sing mga panugyan, wala'y manggad, katulad karón. Ang binuslan ko bumiyà sa pagpanudlò sa pagpamaligyà sing tabakò. Ang imo amáy nagbulig sa akon, nagpatigayon sa akon sing isá ka ba-
__________________
(1) Ang timewa pakok.....—Lubad sang kinatsila nga, "El vulgo
es necio y pues lo paga, es justo hablarle an necio para darle gusto." - Lope de Vega.
