láy kag nagbulig siá sa akon sang kon anó ko nga kinahanglan
sa pagpauswag sang pagpanudlò; nagkadto siá sa buluthoan kag
nanghatag sing kwarta sa kabataan nga imol kag mahugod sa
pagtuón, ginhatagan niya silá sing mga tulon-an kag mga papel.
Apang ini, katulad sang tanan nga maayo nga butáng, walâ mag-
dugay!
—Hinukás ni Ibarra ang iya kalù kag nangamuyò sing madugay-dugay. Inatubang niya sang ulihe ang iya kaupod kag iya ginsingganán.
—Nagsilíng ka nga ang akon amáy nagbulig sa kabataan nga imol, kag karón?
—Karón ginahimò nila ang saráng mahimò kag nagasulát kon may sululaton, —sabát sang pamatan-on.
—Kag ang kabangdanan?
—Ang kabangdanan yarà sa gisión nila nga mga bayù kag mahuluy-on nga mga matá.
Humipos si Ibarra.
—Pilá ang imo mga bumoluthò karón? — Pamangkot niya nga may pagkabalaka.
—Kapín sa duhá ka gatós sa listahan, kag sa klase duhá ka pulò kag limá!
—Ngaa nahanabo inâ?
Ang manunudlò sang buluthòan yumuhóm sing masulub-on.
—Kon isugid ko sa imo ang mga kabangdanan malawig kag makatalaka nga maragtas, —silíng niya.
—Ayaw pagbilanga ang akon pamangkot sa isá ka wala'y pulós nga pangusisà, —sabát ni Ibarra sa mabug-at nga buót nga tumulok sa malayô nga gindut-an. Nakapainuino akó sing maayo, kag nagapati akó nga kon tumanon ko ang mga kaisipan sang akon amáy labing' maayo sangsa hibián ko siá, labing' maayo sangsa magtimalós. Ang iya lulobngan balaan nga kinaugalì, kag ang iya mga kaaway amó ang banwa kag isá ka parì: ginapatawad ko ang nahauná tungód sang iya kapakok, kag ginatahod ko ang ikaduhá tungód sang iya pamatasan kag tungod kay luyag ko nga tahaon ang pagtuluohan nga nagtudlo sa katilingban. Luyag ko nga maghatag sa akon sing kabubut-on ang kalag nga nagpakatawo sa akon, kag tungod sini luyag nakon mahibal-an ang mga kaupangan nga ginasumalang diri sang pagpanudlo:
