—Hùo, maayo gid lang ang mungâ sangsa mga pisů!— Ang sabát niya sa iya lamang kaugalingon sang makita niya. nga naghipos ang mga soldado.
—Diín ang sarhento?— Pamangkot sa tingog nga malain ang buót sang isá sang mga gwardya sibil. Napahibaló na siní ang alpéres?
Kibů sang mga abaga amó ang mga sabat: walâ sing nagsapák sa pagpangusisa nahanungód sang kapalaran sang kailó nga babae.
Didto pinaligad niya ang duhá ka taknà sa kahimtangan nga daw buang nga nagpungkò sa higád, gintabunan niya ang iya ulo sang iya mga kamót, ang mga buhók gumón nga daw kinumos. Sang udto adlaw nakasayod na ang alpéres, kag ang nahauná nga iya hinimò walâ siá magpati sang panumbong sang kura.
—Ha! Padihot sang kuripót nga prayle!— Siling niya kag minandoán niya nga buhìan ang babae kag indi na pagsapakón ang panumbong.
—Kon luyag niya bawion ang ila nadulà, —sugpon niya, —pangayùon nila sa ila S. Antonio4 ukón magsumbong silá sa Nuncio5 Lakát!
Tungód siní, si Sisa pinagwâ sa kwartel, nga tinulód kay indi siá buót maghulag.
Sang didto na siá sa tungâ sang dalan lumakát siá pabalik sa iya balay, nga nagdagundagon, ang ulo wala sing tabón, ang buhók gumón kag ang iya panulok naunáy sa malayô nga gindut-an. Ang adlaw nagtagiti sa udto kag walâ sing bisán isá ka panganod nga naglabay sa iya masilaw nga nawóng: ang hangin naghuyóphuyop sing mahinay sa mga dahon sang mga kahoy, ang dalan mamalá na; bisán isá ka pispis wala magpangahás sa pagbiyà sa landong sang mga sangá.
Si Sisa sang ulihe nakaabót sa iya payág. Sumulód siá, nga apâ, mahipos; linibot niya, humalín, kag lumakát siá sa
____________________
(4) Pangayuon nila sa ila San Antonio — Ini indi si San Antonio Abad, santos nga malipayon sa kabuhi kag sa kahoy nga ginasambit sa Bahin VII, kundi si San Antonio de Padua nga tagtuga sang dalagko nga mge butáng kag nagahimo sang mga milagro. Talupangdan ang ginasugid ni utod Rufa sa Bahin XVII nahanungod sa pagkadula sang iya baboy nga nakite man niya sang ulihe sa bulig sini nga santos.
(5) Magsumbong sila sa Nuncio— Ang masami nga hurubaton sa iningles nga may amó man nga kahulogán amó ini: "Tell that to the marines." Kon sayuron pa, "Ayaw na akó pagsugiri sina nga mga butang.
