Naghipos silá isá ka tión, gintinguhàán nila ang pagpahinay sang ila tingog, apang madali nga nalipát na man silá, nagkinadlaw silá kag pinunt nila ang dalan sang ila pinayàón kag lab-as nga mga paningog.
—Pagpakità ka nga nagasunggod: ayaw ka paghambal sa iya! —Hambal ni Sinang kay María Clara.— Sawayá siá agúd indi maanad sa malain nga batasan!
—Indi ka magsagad pamigos!— Silíng ni Iday.
—Huo magmapigos, ayaw ka magbinuang! Ang nagapangaluyág dapat magtuman samtang siá nagapangaluyág, nga sa ulihe kon mangin-bana na himùon niya ang iya luyag!— Laygay ni katitiya Sinang.
—Anó ang nahibal-an mo sinâ nga butáng, batà —Badlong sa iya sang iya pakaisá nga si Victoria.
—Sst, hipos nagaabót silá!
Sa pagkamatuod, umabot ang isá ka gubán nga mga pamatanon nga lalaki nga may mga sulô nga dalagkò nga tinadtad nga kawayan. Naglalakát silá nga may kaligdong sa lanton sang isá ka gitara.
—Daw gitara sang manogpakilimós! —Siling ni Sinang nga kumadlaw.
Sang magkitaáy ang duhá ka gubán, ang mga babae nagpakaligdong kag nagpakatarong nga daw wala gid abi nila matun-i ang pagkadlaw; sa baliskad, ang mga lalaki naghinambalanay, naghalatag sing katahurán, nagyuhomyuhom kag makan-um nga namangkot sa pagtigayon sing utód-utód nga sabát.
—Malinóng ang linaw? Nagatuo kamó nga may maayo kamó nga panahon?— Pamangkot sang mga ilóy.
—Ayaw kamó magkahangawà, mga ginang; makahibaló akó maglangóy sing maayo!— Sabát sang isá ka pamatan-on nga maniwang, mataas kag magamáy.
—Dapat kitá magsimba anay!— Hambal ni tiyà Isabel nga tinakóp niya ang iya mga kamót.
—May panahón pa ginang; si Albino nga seminarista anay sarang makahiwat sinâ sa baroto,— sabát sang isá nga tinudlo
niya ang pamatan-on nga maniwang kag mataas. Iní siá, nga may pangguyahon nga lahugán, sang mabatián niya nga ginsambit siá, nagpakità sang hulag nga masu!ub-on, nga gin-ilóg niya si P. Salví.
