pilíkpilík, ang magayón nga si Iday kumohà sang arpa; si Iday
indi lamang nga maayo maglanton sini nga kulotingkutingon kundi
may matahúm pa siá nga mga tudlò.
Namalakpak ang mga pamatan-on, hinalukan siá ni María Clara: ang arpa amó ang masami nga ginlanton sa amó nga puód kag amó ang anyù sa amó nga tinión.
—Ambahá Victoria, ang ambahanon sa pag-asawaháy! —Pangayò sang mga ilóy.
Namatok ang mga lalaki kag si Victoria nga may maayo nga tingog, nagsilíng nga maaskad ang iya tutonlan. "Ang Ambahanon sa Pagasaway" isá ka matahúm nga ambahanon nga tinagalóg diín ginalaragway ang tanan nga kaiwatón kag kalisdanan sang pag-asawaháy, nga walâ pag-isambit ang iya mga kalipayan.
Hanti pinangayò nila nga mag-amba si María Clara.
—Ang tanán ko nga ambahanon lunsay masubô.
—Walá'y sapayán, wala'y sapayán!— Siling ang tanán.
Wala na siá magpapilit, kinuhà niya ang arpa, nagpasakalyi kag umamba sa tingog nga nagkurog, matam-is kag napun-an sing balatyagon.
- ANG tinión matam-is sa aton dutà
- Hamilì ang tanan sa adlaw nadanyag.
- Ang dupoydupoy sing kabuhì butà,
- Gugma kag kamatayon— dugós, maanyag!
- KAY nanay bibig halók gagataw
- Kon sa iya dughan ang anák bumogtaw,
- Mga butkon sa liog manalawdaw
- Ang matá kon tumulok nagakadlaw.
- KAMATAYON matam-is sa aton dutà
- Hamili ang tanan sa adlaw natugma;
- Ang hangin kamatayon kon madulà
- Sa isá'ng pungsod, isáng' ilóy kag gugma!
Umontat ang tingog, dumulog ang ambahanon, humipos ang arpa apang sa gihapon padayon ang ila pagpamati: walâ sing nag-pamalakpak. Nabatyagán sang mga pamatan-on nga babáe nga napun-an sing luhà ang ila mga matá, si Ibarra daw nagpalibóg kag ang pamatan-on nga timoníl tumulok sa malayô nga walâ makahulag.
