ch'entrate (Dulàa ang tanan nga paglaum, kamó nga makasulód
dirí),2 kon abi mahibal-an lamang sang kailó nga mga isdà ang
pagbasa sang initalyanhon nga mga tinaga kag mahangpan nila:
ang isda nga makasulód didto indì makagwâ kon indì mapatay.
Isá ka luáng ang manipulon nga malapitlapit sa isá ka metro ang
sangkad palibot, hinimò sa bagay nga saráng matungtongan sang
tawo kag kutob sa iya ginatungtongán makuhà niya ang mga isdà
paagi sa sihod.
—Dirâ indì akó pagtak-an sa pagpamunít sa tigawnan! —Silíng ni Sinang nga nagkurogkurog sa kalipay.
Ang tanán nagtalupangod: ang ibán nagpaabót na sa pagtanaw sang mga isda nga mamilikpilik sa sulód sang sihod, nga mapakilán sang ila masili nga mga himbis kag ibán pa. Apang sang itunton sang batà ang iya sihod, walâ sia sing isdà nga nakuhà.
—Dapat iní mapunô,— silíng ni Albino sa mahinay nga tingog, —kapín na sa limá ka adlaw nga walâ iní diri makadtoí.
Pinabalik sang manogsihod ang tukón tukón...ay! Walâ gid sing bisán isá lamang ka bilog nga diutay nga isdà nga nakapuní sa sihod; ang tubig, sa pagkahulog sa madamò nga tinulô nga ginsilakan sang adlaw, daw nagkadlaw nga nagharakhak. Isá ka A! sa pagdayaw, sa kalain sang buót, sa paghinulsol ang kumawas sa mga bibíg sang tanán.
Sinulit sang bata ang amó man nga pagsihod, kag amó man gihapon ang gwâ.
—Indi ka makahibaló sang imo ginahimò!— Hambal sa iya ni Albino nga sumakà sa bunoan kag kinuhà ang sihod sa mga kamót sang batà. —Karón tan-awón ninyo! Andeng buksi ang kulon!
Apang si Albino indì man makahibaló; walâ man gihapon sing unód ang sihod. Ang tanán nagkinadlaw sa iya.
—Ayaw kamó pagginahod kay mabatián kamó sang mga isdà kag indi silá magpadakóp! Siling niya — Ini nga sihod dapat nga gisî!
Apang nag-alangot man ang tanan nga matá sang sihod.
—Abi akó man,— hambal sa iya ni Leon, nga kahagugma ni Iday.
Iní nag-usisà anay sing maayo sang kahimtangan sang bunòan, tinan-aw niya ang sihod kag sanglit maayo, namangkot siá:
___________________
(2) Lasciate ogni speranza voi Ch'entrate— Kon sayuron: Dulaa ang tanán nga paglaum, kamó nga makasulód diri. Ini nga mga tinaga nasulát sa ganhaan sang Impyerno suno sa "Inferno" nga sinulatán ni Dante
