—Iní tanán kay walâ kitá makasimba!—pusnga sang isá.
—Apang, anó bala nga kalaut ang aton nadangatan, mga ginang? —Pamangkot ni Ibarra. — Ang buaya amó lamang ang may kalaut!
—Ang kamatùoran sinâ,— hingapos sang nangin seminarista, —nga sa bug-os niya nga makasasalà nga kinabuhi walâ gid makasimba iní nga malaot sing palad nga sapat. Walâ gid nakon siá makità sa madamò nga buaya nga nagakadto sa simbahan.
Gani nga ang mga baroto pumakadto sa isá ka punót kag kinahanglan nga si Andeng mag-aman sing isá na man ka pinabukál nga tubig nga tulahan.
Nagtaas na ang adlaw; naghuyóp ang hangin; ang mga balód nagbulogtaw kag naghalanulhanol palibot sa buaya, nga nagbatak ang binukid nga bukál diín nagkililankilan ang madamò nga duág sa silak sang adlaw, sunô sa ginsilíng sang mamalaybay nga si P. A. Paterno.³
Bumalik ang tunóg sang tulalay. Linanton ni Iday ang arpa, ang mga lalaki naglanton sang mga akordyon kag mga gitara nga may mataas ukón manubô man nga pamagay, apang ang la- bíng' maayo amó si Albino, nga kumarabkab sing maayo, nga naglilibagon kag walâ na sa kompas sa tagsa ka tión, ukón ginkalimtan na gid niya kag maglanton na man sang laín.
Ang isa ka punót ginkadtoán nila nga may pagpangduhadoha; madamò ang nagpaabót nga makità nila ang kaupod sang buaya apang ang kinaugali palalahog, kag padayon nga punô ang sihod.
Nagsugò si tiyà Isabel.
—Ang ayungin maayo nga sabawán; ibilin ang biya nga himùon eskabitse, ang haluán kag ang bulánbolan himùon nga pisa. Ang haluán sarang mabuhì sing madugay. Ibutáng sila sa sihod agúd maunay sa tubig. Ang mga lukón sa sartin! ang balanak himùon nga asado, nga putson sa dahon sang saging kag relyenohon sa mga kamnatis.
—Ibilin ang ibán nga isdà nga inogpadapò! Indì maayo nga sigpután ang bunoan, sugpon niya.
Hanti buót na sila mabalik pabaybay, sa talon nga may gulang nga kakahuyan nga iya ni Ibarra. Didto sa mahandong kag sa
_____________________
(3) P. A. Paterno — Si Pedro A. Paterno, suno kay Rizal, isá ka mamalaybay kag ang matahúm nga kasaysayan nahanungod sa mga balód kinuha niya sa binalaybay ni Patemo.
