—Sin-o nga kriminal, P. Kura? — pamangkot sang alpéres nga nagtulok sa prayle lapos sa baso nga may alak nga iya gininum.
—Kon sin-o sia? Yadtong' sang isa ka hapon bumalbał kay P. Dámaso sa dalan!
—Bumalbal kay P. Dámaso? — Pangutana sang nagkalainlain nga mga tingog.
Ang koadhutor daw kumadlaw.
—Huo, kag si P. Dámaso nagahigda nian sa hiligdaan! Ginapatihan nga amo man si Elías nga tumagbong sa imo sa tulogban, Gg. Alpéres.
Ang alperes nagpalamulá ayhan sa kahuyâ ukón sa alák man. —Nagtuo akó,— ang padayon ni P. Salví nga may diutay nga lahóg,— nga nakasayod ikaw sang hitabô, ginsilíng ko, alpéres sang gwaydya sibil . . .
Kinagát sang militar ang iya mga bibig kag nagkurog nga naghatag sang isa ka binuang nga pamalibad.
Sini nga tión, pumakità ang isá ka babáe nga maluspad, maniwang, nagapanapót sing makaluluoy, walâ sing nakatalupangod sa iya nga sumampot, sanglit kumarâ siá nga mahipos nga wala sing bisán diutay nga gahod nga kon sa gab-i abi mabilang siá nga isá ka bahoy.
-Hatagi sing pagkàon ina'ng makalulùoy nga babáe!— Siling sang mga tigulang. —Hoy!5 Karí ka!
Apang pinadayon niya ang iya paglakát kag pumalapít sa latók diín yadto ang kura: linisò síní ang iya guyá, nakilala niya ang babae kag nabutanwan niya ang kutsilyo sa iya kamót.
—Hatagi sing pagkàon iní nga babáe! —Sugo ni Ibarra.
—Madulóm ang gabi kag nadulà ang kabataan! — Kíbot sang manogpakilimós.
Apang sang makita niya ang alpéres nga ginpatungdan niya sang iya tinaga, nakayasan ang babae kag dumalagan nga nadulà sa mga kakahuyan.
—Sin-o inâ? —Namangkot siá.
—Isá ka makaluluoy nga pinabuang nila sa lakás nga mga kakugmat kag mga pagpangalisod! - Sabát ni D. Filipo.— Mga apat na ka adlaw nga nagsubong sinâ siá.
______________________
(5) Hoy — Isa ka pakunyag nga taga, nga ginagamit sa kubós nga sari sang tawo. Kon sayuron pa, pamatii!
