KON ABI ang dungganon nga mga gwardya sibíl, sang tapos nila matublag ang labù, nakakadto sa isá ka duóg nga nasay ran naton, sang walâ pa magtunod ang adlaw sang amó nga hapon, nakità nila sa wala'y duhadoha ang ila ginpangità.
Isá ka diutay nga payág, apang matahúm, nga pinatindog sa pangpang sang linaw sa isá ka kataasón nga humilway siní sa mga gamhon nga nagatulubò, sa tungâ sang magapà nga kawayanan, mga bonga kag kalubihán. Mga bulak nga mapulá, katulad sang kamantigi marabilya nga nagatulubò sa kunsarán sang talunanon kag madamol nga banglid, nga bató nga buhî, nga walâ masiádsiád katulad sang hagdanan nga nagapanaog sa linaw. Ang bahin nga kadak-an nahumán sa nipà kag kugon kag kawayan kag napunihán sing mga lukáy nga nabenditahan sang Domingo de Ramos kag kabulakan nga hinimò sa tinsim nga nabuksan nga bintanà sing isá ka sangá nga daw maninilág halín sa China. Ang isá ka punò nga ilang-ilang nagapauntay kag nagahugóm sang hangin sa kaamyon. Sa ibabaw sang alibungan nagsasaka amát-amát ang mga sulóg kag mga mungâ nga manók, samtang ang ibán nagapabilin nga nagabuluylog sa mga pato, mga pabo kag mga pating sa paghingapos sa pagtukâ sang nabilín nga mga binantok sang humáy kag maís nga sinabwag sa isá ka nakawàán.
Sa ibabaw sang pantaw nga kawayan nga nagahimulós sang sanag sang adlaw nagatahi ang isá ka pamatan-on nga babáe nga may napulò kag pitó ukón duha ka pulò man nga panuigón sang isá ka bayù nga may masilì nga mga duág kag mga lugás nga nagasibág. Ang iya mga bayù inimol apang mahipid kag matinlò. Ang iya bayù subong sang iya palda kag sang iya tápis napun-an sing mga tinapakan kag sinursihán. Ang tanan niya nga puní, ang tanan niya nga hiyás amó ang isá ka abaw nga peyneta de karey, nga amó ang ginakimpit niya sa iya buhók, kag ang isa ka rosaryo nga may itúm nga mga binilog nga iya ginakolintas kag ginapaibabaw sa iya bayù.
Makisáy siá sanglit siá pamatan-on, may matahúm nga mga matá, diutay nga ilóng, diutay man nga bàbà, nga nagakabalantang sa iya pangguyahon, kag matam-is nga balatyagon nga nagalutáw sa iya nawóng. Apang indi iní isá ka kagayunan ng
