kon kaisa nagapahanumdom sa akon sing masakit sang mga
pagpalanggà sang akon mga ginikanan, kon indí lamang tungód
nga indi akó maluyag nga ang akon mga anák magbalatás katulad sang ginabatás nakon kag sang akon utod nga babae, nagligad na ang binulan nga ikaw ang akon nangín-asawa sa mga
matá sang Diwa kag karón nagapuyô sa mga tawo. Apang
tungod sa siní man nga paghigugma, sa akon palaabuton nga
panimalay nanumpa akó sa pagpatay sang malaot ko nga kapalaran nga gikan sa mga ginikanan pakadto sa mga anák amon
ginpanubli, kag dapat nga amó ang mahanabò nga ikaw ukón
akó indi maluyag magpamati sa aton mga anák nga magpanumbong nahanungód sang aton pagpalanggà nga kalisdanan lamang ang aton sa ila mahatag. Maayo ang imo ginaisip nga.
magkadto sa puloy-an sang imo mga himatâ, limuta akó, limuta ang isa ka paghigugma nga binuang kag wala'y pulós!
Ayhan didto makakità ka sang isá nga indì katulad sa akon...
—¡Elías! —tablà sang dalaga nga nagahinulsol.
—Walâ nimo akó mahangpi sing maayo. Nagahambal akó sa imo katulad sang nagahambal akó sa akon utod nga babae kon buhi, sa akon mga tinagâ walâ sing maskin anó nga panumbong batok sa imo bisán tinagò nga panghunâhonà. ¿Ngàa man nga magkasubô ka sa paghinulsol? Patiha akó, kadto ka sa balay sang imo mga himatâ, kalimti ako, kay sa imo paglimot sa akon magabuhin ang kalaot sa akon kapalaran. Dirí walâ ka sing liwan nga butang kundi akó lamang, kag sa adlaw nga mahulog akó sa gahúm sang mga nagahingabót sa akon, mabilín ikaw nga isá, kag mangín-isá ikaw sa bug-os, nga panahon nga mabilín sa imo kinabuhi kon mahibal-an nga ikaw mangín-katipan ni Elías. Panginpusli ang imo pagkalanubò kag ang imo kaanyag sa pagpangità sang isá ka maayo nga bana, nga bagay sa imo; walâ, walà pa nimo masayri kon daw anó ang magpuyô nga mangín-isá, nga isá sa tungâ sang mga katawohan.
—Nag-isip akó nga updan mo ako...
—!Ay! —sabát ni Elías nga tinaklap niya ang iya palad sa iya agtan, —indi mahimò, labí na karón! Tubtob karón wala pa nakon makità ang ginkarí ko sa pagpangità, indì mahimò! Karón nga adlaw nausikan ko ang akon kaluwasan!
Kag sinugid ni Elías sa malip-ot nga mga tinagâ ang nahanabò sang amó nga aga.
