magagming nga papel nga linubád ko: ang isá nasulát sa ininsik
kag isá ka pang-abiabi gikan sa mga baybayon sang Hoang-ko,
kag ang isá, suno sa ginahunahona sang insik nga ginpakigkitaan
ko, ayhan hapones. Apang ginalingaw ko ikaw sa sini nga mga
butang kag walâ ko ikaw mapamangkot kon sa anó nga bagay
nga ako makabulig sa imo.
—Nagkarí ako sa paghambal sa imo nalanungód sa isá ka butáng nga malahalon, sabát sang pamatan-on.— Kahapon sang hapon...
—Nadakóp nila yadto'ng walay palad?—sal-ot sang tigulang nga punô sing kabalaka.
—Nagahambal ka nahanungód kay Elías? Ngàa nakahibaló ka sinâ?
—Nakità ko ang isbing sang gwardya sibil.
—Ang isbing sang gwardya sibil! Kag sin-o inâ nga isbing?
—Ang asawa sang alpéres, nga walâ nimo pag-agdahá sa imo badù. Kahapon sing aga nabalahubà sa banwa ang nahanabò sa buaya. Ang isbing sang gwardya sibil may kaabtik manilag subong nga may kalain, kag naglaum nga ang timoníl amó ang makahas nga pumasaog sang iya bana sa lunang kag bumalbal kay P. Dámaso kag sanglit ini nga babae nagbasa sang mga pasayod nga dapat batunon sang iya bana, halos ini makaabót sa ila baláy nga hubóg kag walâ sing maayo nga pangalibutan, pinadalá niya, sa pagtimalós sa imo, ang sarhento upód ang mga soldado sa tuyo nga tublagón ang kinalipay sa badù. Mag-andam ka! Si Eva isá ka maayo nga babae nga naghalín sa mga kamót sang Diwa... si Donya Consolacion ginasugid nila nga malain kag wala mahibal-i kon diín nga mga kamót maghalín! Ang babae, agúd nga mangín-maayo, kinahanglan nga maskin makaisá lamang, mag-agi siá sa pagkalin-ay ukón sa pagkailóy.
Si Ibarra nagyuhóm sing diutay kag nagsabát nga kinuhà niya sa iya kartera ang pilá ka papel:
—Ang namatay ko nga amáy masami namangkot sa imo sa pilá ka mga butáng, kag nadumdomán ko nga naghatag siá sa imo sing pangibulahan nga iya nasunod ang imo nga gintudlò. May yari akó sa akon mga kamót nga diutay nga hilikutón nga ang iya maayo nga pagtigayon kinahanglan ko nga masaligan. Kag sinugiran siá ni Ibarra sa malip-ot nahanungód sang proyekto sa buluthòan, nga iya gintanyag sa iya kahagugma, nga
