kapin sangsa ibán, nagbalakal sing serbesa, tsampan, mga alák, kag
mga kalan-on gikan sa Europa, nga halos nila matilawán ang isá
ka timů ukón matam-irán bisán isá ka tulô. Ang ila latók naaman
sing labing' matahúm.
Sa tungâ may isá ka daků nga pinya nga hinimò, nga inilóg sing maayo, diín nalansang ang mga palito nga inogpaningá, nga hinimò sing maayo sang mga bilanggo sa ila mga tión sa pagpahuway. May yarà nga abaniko, may isá ka pungpong sang mga bulak, isá ka pispis, isá ka bulak, isá ka paklang ukón mga talikala; nga ang tanan linukit sa isá lamang ka bilog nga kahoy; ang taghimò pinilit, ang galamitón, isá ka malain nga kutsilyo kag ang balatyagon tingog sang bastonero. Sa pihák kag pihák siní nga pinya, nga gintawag nga palalitohán nagtulumpok sa ibabaw sang mga bulotangan-bungangkahoy nga kristal ang mga pirámide sang mga naranghita, mga lansones, mga atis, mga tsiko kag mga pahù pa wala'y sapayán nga Nobyembre, Kag, sa masangkad nga mga pinggan, sa mga papel nga daw engkahe kag naduagán sing masili nga mga duág, ginpakità ang mga hamón gikan sa Europa, sa China, isá ka daku nga pastel sa dagway sang Agnus Dei, ukón salampati, nga amó man ang Balaan nga Kalág, mga relyenong' pabo, kag ibán pa, kag sa tungâ sini ang inogpagana nga mga garapon sang mga atsara nga mga nadibuhòan sing matahúm, nga hinimò sa bulak sang bonga kag ibán pa nga mga utanón kag mga bungangkahoy, hiniwà sing makiambungon kag nabutangán sing pulót sa mga higád sang mga garapon.
Tininlòán nila ang mga globo nga kristal, nga pinaalinton halín sa mga ginikanan pakadto sa mga anák; ginpakintab nila ang mga puníponi nga saway; ginpanghuksan nila sing mga putós nga pula ang mga lámpara sa agás, nga walá masudli sing mga langaw kag mga lamók sa sulod sang isá ka tuig kag walâ magamit: ang mga almendra kag mga kristal nga pinakabit sa dagway sang mga prisma naghalabyughabyog, nagkinalaykalay, nag-alamba, nga sila daw nagpakigbahin man sa pandot, nagkinasadya kag ginlapta nila ang silak nga pinakilán sa putî nga dingding ang mga duág sang balangáw. Ang kabataan naghinampang, nagkalalingaw, ginlagaslagas nila ang mga duág, ila nasandad, nabukâ ang mga tubo, apang ini walâ nagaupáng sa pagpadayon sang kinalipay sang pandot: sa ibán nga bahin sang tuig ang mga luhà nga matulò gikan sa ila manipulon nga mga matá magasugid sang tuhay nga butáng.
