Sa lwás sang banwa, ang mga bukidnon, ang mga mangangagsa nagsuluót sang ila labing' matahúm nga mga panapton sa pagdalá sa mga baláy sang mga magkakumboya nga pahunanan sang ila sinagód sing maayo nga mga manók, mga baboy nga talunón, mga usá, mga pispis; ang pilá sa ila naglulan sa ila mabug-at nga mga karo sing mga inoggalatóng nga kahoy, ang ibán mga bungangkahoy, mga tanúm nga balagon, nga mga labing' malahalon nga nagpanubò sa talunan: ang ibán nagdalá sing bigá nga may malapad nga mga dahon, mga bulak sang dapdap nga ang duág daw kalayo nga inogpuní sa mga ganhaan sang mga balay.
Apang diín naghari ang daku nga kinasadya nga nahimò na nga kinagulà, didto sa isá ka daw masangkad nga latok nga may pilá ka tikáng kutob sa balay ni Ibarra. Nag-inigot ang mga motón, mabatián ang sininggit, ang daw metal nga gahod sang bató nga ginpiko, ang martilyo nga ginpàpà sa lansang, ang wasay nga ginlabra sa tablon. Isá ka gubán sang mga tawo nagkutkot sang dutà kag nagbukás sang isá ka masangkad kag madalum nga buhò; ang ibán nagpinig sang mga bató nga kinuha sa mga duóg nga dulolangán sa sulod sang banwa, naghalaw-as sang mga lulan sa mga karo, nagtumpok sang balás, nagkaayo sang mga aliling kag sang mga kabistante...
-Dirì! Dirâ inâ! Dali! Singgit sang isá ka gulánggoláng nga tawo nga may pangguyahon nga masadya kag mapainuinu- hon, nga may iya nga bilang baston nga isá ka metrosan nga may mga kanto nga saway, nga ginsabdan sang higót sang pamató. Siá ang maestro sa mga hilikutón, si Nyor Juan,4 nga arkitekto, albanyil, panday, manogpaputî-kalù, manoghimò sang mga kandado, manogpaminta, manogsiad-bató kag kon kis-a eskultor man.
-Kinahanglan nga tapuson inâ karón nga daan! Bwás indì na makapangabudlay kag sa isá ka bwás amo'ng seremoniya! Dali!
-Himda ninyo inâ nga buhò sa bagay nga makaigô kon isulod iní nga silindro Silíng niya sa pilá ka manogsiad-bató nga nagsapsap sang isá ka daků nga bató nga apat sing kilid: sa sulód sini tipigan ang aton mga ngalan!
Kag ginsulitsolit niya sa tagsa ka bag-o nga dumalay-o nga nagpalapit ang iya na nahambal sing makalibo:
___________________
(4) Nyor Juan Sa paggamit sang mga pilipinhon sang mga hambal nga kinatsila, sa masunson ila ginpalip-ot. Halimbawa ang Domingo, ila ginmit lang nga linggo; Fernando, Andong; Vicente, Inteng ukón Teng, kag ibán pa
