—Aba! — Sabat sang tawo nga madalag nga nagyuhom sa bagay nga salat-umon. — Labi nga madamo ang kasangkapan nga mabutang naton sa hilikuton labing’ daku nga kaayuhan ang aton matigayon. Ang madamo labi nga may tulukon ka, labi nga talupangdan nila kag masiling sila: daw ano ka daku sang ila inubrahan! Tan-awon mo, tan-awon mo kon ano nga inogbatak ang patindugon ko! Kag sa ulihe punihan ko ina sing mga hayahay, mga balagubay sang mga dahon kag mga bulak... makita nimo sa ulihe nga may katarungan ka sa pagkuha sa akon nga isa sang imo mga mamumugon, kag si Gg. Ibarra indi na maghandum sang iban pa!
Kag ang tawo nagkadlaw kag nagyuhom. Si Nyor Juan nagyuhom man kag naglungblungo. Nag-antad kutob didto makita ang duha ka kiosko nga tinabid sang daw mga balagon nga gintabunan sang mga dahon sang saging
Ang manunudlo sa buluthoan kag ang katloan ka kabataan nagsalapid sing mga korona, nagpakabit sing mga hayahay sa magagmay nga mga haligi nga kawayan, nga nabarahusan sing puti nga panapton.
—Tinguhai nga ang mga tigbato masulat sing maayo! —Hambal niya sa mga nagsulat sang mga tinaga. — Ang alkalde maabot, madamo nga kura ang mabuylog, ayhan pati ang Kapitan Heneral nga yari sa puod! Kon makita nila nga maayo ang inyo pagdibuho, dayawon kamo nila dayon.
—Kag dulotan nila kami sing isa ka pisara ... ?
—Sin-o ang makahambal! Apang si Gg. Ibarra nakatugon na sing isa sa Manila. Bwas maabot ang pila ka butang nga igapanagtag sa inyo bilang mga padya... Apang, pabay-i ina nga mga bulak sa tubig, bwas manghimo kita sing pinungpong nga mga bulak, magdala pa gid kamo sing mga bulak, kay kinahanglan nga ang latok mapun-an sina; ang kabulakan nagapalipay sang panulok.
—Ang akon arnay madala bwas sang mga bulak sang baino kag isa ka alat sang mga sampaga.
—Ang akon iya nakadala man diri sing tatlo ka karito nga balas kag wala makabaton sing bayad.
—Ang akon tiyu nakatug-an sa pagbayad sang isa ka manunudlo. — Sugpon sang hinablos ni Kpn. Basilio.
