Sa pagkatutuo, ang proyekto sang buluthòan ginpakamaayo sang tanán. Ang kura nangayò nga siá ang mangin-paninoy kag magabendisyon sang pagbutáng sang nahauná nga bató, seremoniya nga pagahiwaton sa katapusan nga adlaw sang pandot, nga manginisá sang iya labing' dakû nga maligdong nga hiliwatón. Ang koadhutor nakapalapít man kay Ibarra nga nagtanyag sa iya sing pilá ka misa nga takós mabayaran sang mga tumolùo tubtob matapos ang pagtindog sang buluthòan. Kapin pa, si utod Rufa, ang manggaranon kag mainot nga babae nagsilíng nga kon kulangon sa kwarta, siá magalibot sa kabanwahanan sa pagpangayò sing limós apang kinahanglan lamang nga bayaran ang iya kahinguyangan. sa paglibot kag sa pagkaon kag ibán pa. Si Ibarra nagpasalamat sa iya kag nagsabát:
—Walâ kitá sing makuhà nga daků nga butáng: indì man akó manggaranon bisán iní nga baláy indì man kay simbahan. Labot pa, wala ako makatug-an nga patindugón iní sa kahinguyangan sang ibán.
Ang mga pamatan-on nga lalaki, ang mga bumoluthò nga nag-alabót gikan sa Manila sa pagdugok sa pandot, nagdalayaw sa iya kag ginbilang nila siá nga isá ka huwaran; apang, sanglit masunson nagkahanabo, kon luyag naton ilugón ang kinilala nga mga tawo, gin-ilóg lamang naton ang ila mga pagkadiutay kon indi ang ila kakulangán kay sa isá ka bahin indì man kitá makasangkol; ang kalabanan siní nga mga dumalayaw nagtalupangod sang pagtakód sang pamatan-on sang laso sang iya korbata, ang ibán sang dagway sang kwelyo sang iya kamisadentro kag indi diutay ang sa kadamùón sang mga butones sang iya amerikana kag tsaleko.
Ang madulóm nga mga panagnà ni tigulang Tasio daw nadulà tanán. Amó iní ang ginhambal sa iya ni Ibarra isá ka adlaw, apang ang tigulang nga nagbatyag sang pangduhadoha nagsabát: —Dumdumón mo ang ginsilíng ni Baltazar:
- Kon ang magsug-alaw sa imong' pag-abót
- Masadyang' guyá may daláng' kalipay,
- Labi kang mag-andam kay siá may lipót...'
Si Baltazar isá ka maayo nga mamalaybay subong man nga mapainuinuhon.
Iní kag ibán pa nga mga butang nagkahanabo sang tughapón sang pandot sang wala pa magtunod ang adlaw.
