pilá ka tigulang nga babae naghinutikanay samtang nga nag-ulosang sang buyò: "Daw Birhen!"
Didto uminóm silá anay sang tsokolate. Si Kpn. Basilio nangin-maayo nga abyan kag manog-apín ni Ibarra kutob sadto'ng ila pagbadò. Nahibal-an niya sa telegrama, nga ginpakita sa iya anák nga si Sinang, nga nakasayod siá nga ang kasabà napamatbatán na nga ginbayaw ang iya kinamatarong, tungód siní, sanglit indì siá maluyag nga lutuson siá sa pagkaalwan sing kabubut-on, luyag niya nga sikwayón ang ginkaisahan sa hampang sang ahedres. Apang, sang walâ magsugót si Ibarra sa sinâ, si Kpn. Basilio nag. hingyò nga ang kwarta nga inogbayad sa kahinguyangan sang kasabà, gamiton sa pagbayad sang isá ka manunudlò sa palaabuton. nga buluthòan sang banwa. Tungód siní, ang manogpamulong-pulong naggamit sang iya kinaadman sa paghambal agúd ang ibán nga mga kasumpong indì magpadayon sa ila mga paghingamó kag nagsilíng sa ila:
—Patiha ninyo akó: sa mga kasaba ang nagadaóg mabilin nga wala sing bayu!¹
Apang walâ siá makapapati sa bisán kay sin-o, wala'y sapayán sang iya paghinambit sang mga romanhon.
—Sang tapos sila makainúm sing tsokolate, ang aton mga pamatan-on mamati pa sa pyano, nga lantunón sang manlalanton sa organo sang banwa.
—Sang mabatián ko siá sa simbahan.—silíng ni Sinang nga tinudlò niya ang manlalanton, - maluyag akó magsaot; karón nga ginalanton niya ang pyano daw maluyag akó magpangadî. Tungód siní maupód ako sa inyo.
—Luyag ka mag-upód sa amon karón sa gab-i? — Pamangkot ni Kpn. Basilio sa dulonggan ni Ibarra sang iya pagpaalam. — Si P. Dámaso mabutáng sing diutay nga bangka.
Yumuhóm si Ibarra kag sumabát nga lumungôlungò nga nagkahulogán sing huo ukón indi man.
—Sin-o inâ?—Pamangkot ni María Clara kay Victoria, nga iya tinudiò sa isa ka maabtik nga pagpasiplat ang isá ka pamatanon nga nagasunod sa ila.
—Inâ... isá nakon ka pakaisá,—sabát niya nga natublag diutay.
—Kag ang isa?
____________________
(1) Sa mga kasaba ang nagadaóg mabilin nga wala sing bayú — Ukón sa isa ka pulong, tungod sa kasaba ang tawo maubosan sang tanan niya nga manggad.
