Si Ibarra nakabaton man sing isá ka diutay nga sulát nga napahamután, nga hinatag ni Andeng, ang inayóp nga utod ni María Clara, sa iya sang gab-i sang nahauná nga adlaw sang pandot. Ang sulat nagsilíng:
"Crisóstomo: Isá na ka adlaw ang nagligad nga walâ ko na ikaw makità; nakabati akó nga may diutay ka nga masakit, nangadi ako nahanungód sa imo kag nakasindi ako sing duhá ka kandilà wala'y sapayán nga si Papá nagsiling nga indi man mabug-at ang imo pagmasakít. Kagab-i kag karón nagamhan akó nga ginsagad nila akó palanton sa pyano kag gin-agda nila akó sa pagsaot. Wala akó makasayod nga may madamò nga makatalaka nga tawo sa kalibutan! Kon indi lamang tungod kay P. Dámaso nga naghimulat sa paglingaw sa akon sa pagsugilanon kag paghambal sang madamò nga butáng, kuntani nanirado ako sa akon hulót sa pagtulog. Sulatí akó kon anó ang nahanabò sa imo, kay singganón ko si Papá nga dùawon ikaw. Sa karón. ginapadala ko sa imo si Andeng nga làgàán niya ikaw sing tsa: makahibaló siá maglutò sinâ sing maayo kag ayhan maayo pa sangsa imo mga suluguón.
- MARIA CLARA
"P.D. Kon indi ka makakarí bwas. indi akó magkadto sa pala- tuntonan. Akó man."
