ANG MGA BANDA sang músika naglalanton sang pagpamanagbanag sang kaagahon, nga pumokaw sa mga lanton nga masadya sang lapyù nga mga pumnoluyo sang banwa. Bumalik ang kabuhi kag kakunyag, ang mga lingganay nagbalagting liwát kag nagsugod ang linupok.
Iní amó ang hingapusán nga adlaw sang pandot, kag sa pagkatutùo amó na ang pandot. Ginpaabót nga madamò ang makità, labí sangsa nagligad nga adlaw. Ang mga Utod sang V.O.T. labí nga madamò sangsa mga katapò sang Santisimo Rosario, kag ang iya mga katapò nagyuhóm nga may kaawà, kag nagsalalíg nga mapakahuy-an nila ang ila mga kasumpong. Nakabakál silá sing labing' madamo nga kandilà; ang mga insik nga manoghimò sang kandilà nakahipo sing maayo, kag bilang balos nanghunâhonà silá nga magpabunyag, labot pa nga ang ibán nagpasalig nga indi tungod sa pagtuo sa pagka-katoliko kundi sa handum nga makakuhà sing asawa. Apang sa siní nagsalabát ang matinuohon nga mga babae:
-Maskin mag-amó inâ, ang pagpakasal sang madamo nga insik sing dulongan indì mahimò nga isá ka milagro, kag buyukon silá sang ila mga asawa nga mangin-katoliko.
Ang mga tawo nagsuót sang labing' maayo nga mga panap. ton; gumwâ sa ila mga tinagò ang tanan nga hiyás. Ang mga tahur kag mga humalampang nagsuluót man sing mga bayù nga binordahán nga may mga butones nga dalagkò nga batomaidlak, mabug-at nga mga kadena nga bulawan kag puti nga mga kalù nga hipihapa. Ang tigulang lamang nga pilósopo ang walâ magliwát: nagsuót sing bayù nga sinamáy nga may masagil-um nga mga kurit, nga nabutonisan tubtob sa kwilyo, halóg nga mga sapatos kag malapad nga kalù nga piltro nga abu-abuhon ang duág.
Labí karón ang imo pagpangasubô! Siling sa iya sang tenyente mayor.-Indi ka maluyag nga magpangalipay kitá kon kaisá, sanglit madamò ang aton pagahibián!
-Ang pagpangalipay indi buót singganón nga maghimò sing
hinuang! Sabát sang tigulang. Amó iní ang binuang nga pag-
