HALIN SA ISA KA UTBONG pakadto man sa isá napunô sang mga tawo ang kamarin nga ila ginhalad sa Tagtuga sang tanán nga nagakabuhî.
Nagdinis-uganay, nagpinit-agay, nag-apiitáy ang isá kag isá. nga nagpalanghayhay ang pilá nga nagginuwà kag ang madamò nga nagsululód. Sa malayô pa, ginpauntay na nila ang ila mga butkon sa pagtusmog sang ila mga tudlo sa nabenditahan nga tubig, apang nagdugang ang giniusgìos sang mga tawo kag ang mga kamót nagpahilayô: hanti mabatián ang isá ka ugayong, isá ka babae nga nalapakan nagpasipala, apang nagpadayon ang pagdinis-uganay. Ang ibán nga mga tigulang nga nakatigayon sa pagtusmog sang ila mga tudlo sa amó nga tubig, nga lumubog na, diín nagpanghinaw ang bilóg nga banwa nga ang kalabanan naghalín sa ibán nga kabanwahanan, namalhit siní sing matinùohon, nga may kapiot, sa lubót, sa dungandongan, sa agtang, sa ilóng, sa sag-ang, sa dughan kag sa pusod sa pagtùo nga iní tanán nga bahin sang lawas mahatagan sing bugáy nga balaan kag indi magbatyag bisán sang pagtiskog sang liog, bisan sakit sang ulo, anus, ukón sakít sang tyán nga indì matunawan. Ang mga pamatan-on, maayo sanglit indì mga masakitón ukón walâ pagpati sa amó nga balaan nga inogpanagang sa balatian, halos nagtusmog sang utbong sang ila tudlò — agúd ang matinuohon nga mga tawo walâ lamang sing ihambal, — kag gintudlò nila ang ila mga agtang apang walâ man ginpadapat sa pagpapati. "Bendita man iní tanán." hunâhonà sang isá ka pamatan-on nga babae, "apang malubóg..."
Mabudlay ang magginhawa; tuman kainit kag nag-alisngaw ang bahù sang tawo; apang sa manogwali tuman man iní tanán nga kahiól; sa iya wali ang banwa nagbayad sing duha ka gatós
kag kalim-an ka pesos. Si tigulang Tasio nakahambal:
