—Duhá ka gatos kag kalim-an ka pesos sa isá ka pagwali! Isá lamang ka tawo kag kis-a lamang! Isá sang tatlo ka bahin nga mabaton sang mga komedyante nga nagpangabudlay sing tatlo ka gab-i!... Kinahanglan nga manggaranon kamó kaayo!
—Anó labot sinâ sa komedya? — Sabát nga naglain ang buót sang nerbyosong' manunudlò sang mga utod sang V.O.T.
—Sa komedya ang mga kalág nagakaladto sa impyerno, kag sa wali sa langit! Abi kon nangayò siá sing isá ka libo, binayaran namon siá kag sa gihapon pasalamatan pa namon...
— Sa ibabaw sang tanán may katarungan kamó! — Sabát sang ulihe sang pilosopo, — sa akon labi pa nga makalingaw ang wali sangsa komedya.
— Apang, sa akon, bisán ang komedya! — Singgit sang isa nga naakig.
— Ginapatihan ko inâ, sanglit mahangpan mo ang isá subong man ang isá!
Kag ang di-matinùohon lumakát nga walâ magsapák sang mga pasipala kag malaot nga mga panagnà sang naakig nga manunudlò sa iya palaabuton nga pagkinabuhî.
Samtang ginhulát ang Alkalde, ang mga tawo ginbalhas kag nagpalanguy-ab: nagpalanguyáb silá sing mga abaniko, mga kalù kag mga panyù; nagsiniyagit kag naghinibi ang mga bata, nga nakahatag alatipanón sa mga sakristan sa pagpagwâ sa ila sa simbahan. Iní nakapahunâhonà sa matinatapon kag nagaubó nga manunudlo sang Kopradya ni Smo. Rosario sang masunod:
— "Pabay-i nga ang mga batà magpalapít sa akon," siling sang aton Gg. Jesucristo. — Matuod apang, diri dapat hangpon ang kabataan nga walâ paghibî!
Ang isa ka tigulang nga babae nga nagpanapót sing ginggon. si Utod Putî, naghambal sa iya apó nga babác, isá ka batà nga anum ka tuig, nga nagluhód sa iya luyó.
— Makasasalà! Pagbantay sing maayo, kay mamati ka sang isá ka wali nga katulad sa Byernes Santo!
Kag kinusî niya nga nagpabugtaw sang pagtùo sang bata nga kumoriit, pinabuslo ang iya bibig kag pumasampok sang iya mga kilay.
Ang pilá ka tawo. nga nagkalatinkatin, nagtuyayo malapít sa mga kulompesaran. Ang isá ka tigulang nga lalaki, nga nagpadunglay sang iya ulo, nagpapati sa aton tigulang nga babáe
