sinundan man dayon sang iya lawas. Nagtulok siá sa tanán nga
bahin nga may pagsalig, nga nag-ubóubó; nakità niya si Ibarra:
pinangilayán niya nga nagpahangóp nga indi niya siá malímtar
sa iya mga wali; sang ulihe isá ka malipayon nga panulok kay
P. Sibyla kag ang isa ka panulok nga may kahisà sa kay P. Manuel Martin, ang manogwali kahapon. Natapos ini nga pagpanan-awtan-aw bumalik siá sa pagtulok nga nagpahilúm sa iya
abyan nga nagsilíng sa iya: "Pagbantay, utod!" Binuksan siní
ang kwaderno.
Apang ang wali nagkinahanglan sing isá ka tuhay nga bahin. Ang isá ka pamatan-on nga nagtuón sing takigrapiya kag sadto humalangád sa dalagkò nga mga manogpamulongpulong, amó ang naghuwád. Salamat siní saráng naton mapagwâ dirí ang huwád sang isá ka balaan nga pamulongpulong sang amó nga mga kapupod-an.
