maabi-abihon nga may pamatasan; mapainuinuhon nga may kaalam; mainawaon nga may kaluoy; mahuluy-on nga may huyà;
matinagubaluson nga may kaisog; imol sa pagpangabudlay nga
may pagpasugót; mahinguyangon nga mainot; mapisan nga dìmasinapakon; mainot nga buhahâ; walâ makasayod nga nakahangóp; manogsabdong nga dalayon; walâ pagsapák nga may luyag sa pagtuón; gintuga ka sang Diwa sa pagbatyag sang gugma
nga dìmabinatyagon...! Buligi akó sa pag-amba sang imo pagkadalagangan kag sang imo ngalan nga labí katàas sangsa mga bitùon kag labí ka sanag sangsa adlaw nga nagalibot sa imo mga
tiil! Buligi akó ninyo, pangayóa sa Diwa ang nagakaigò nga
balatyagon sa pagpangadi sang avemaría!"
Ang tanan nagluluhód nga pumahayaw sang kinibutkibot nga
daw hagong sang isá ka libo nga lagóng. Lumuhód ang Alkalde
nga binudlayan kaayo, nga lumungôlungò nga malain ang buót:
ang alpéres nagpangluspad kag mahipos.
—Ang yawà nga kura!— Kumod sang isá sang duha ka pamatan-on nga naghalín sa Manila.
—Hipos! — Sábát sang isá,— basi mabatián kitá sang iya inday-inday...
Sa karón, si P. Dámaso, sa baylo nga magpangadi sang avemaría, naakig sa iya kalág nga balaan sa iya paglaktaw sang tatlo niya ka labing' maayo nga hinut-ong sang iya wali, nagkaon sang duhá ka merengge kag isá ka baso nga Málaga, nga nagsalig nga dirâ makita niya ang dakû nga bulig sangsa tanan nga kalág nga balaan, bisan sa kahoy nga dagway sang salampati, ukón sa unód na gid sa dagway sang isá ka malipaton nga prayle. Sugdan na niya ang wali nga tinagalóg.
Ang tumolùo nga tigulang nga babáe dumakóp naman sang iya apó sa liog, nga nagbugtaw nga malain ang buót kag namangkot:
—Tión na balá iní sa paghibî?
—Indì pa, apang indi ka magtulog, kondenada! Sabát sang maayo nga lola.
Sa ikaduhá nga bahin sang wali ukón tinagalóg wala kitá sing makuha kundi pilá lamang ka tagdiutay nga dinikta. Si P. Dámaso humambal sing tulagpak sa siní nga pulong, indì tungód nga nahibal-an niya sing maayo, kundì tungód nga ginbilang niya nga ang mga pilipinhon gikan sa mga puód nga walâ sing ina-
