ANG MADALAG NGA TAWO nakatuman sang iya hinambalán: indi yadto isá ka aháw nga inogbatak ukón motón ang iya pinatindog sa ibabaw sang bukás nga buhò agúd mahulog ang isa ka daku nga buhî nga bató; indi yadto tatlo ka pinasig-ang nga mga tukód nga amó ang luyag ni Nyor Juan nga takdan sang isá ka motón sa ibabaw, kundi isá ka butáng nga kapin pa, isá man dayon ka mákina, isá ka puní apang isá ka daků kag makahalawhaw nga puní.
Labáw sa waló ka metro ang kataasón nagtindog ang gumón kag nagsalakot nga mga andamyo: apat ka madamol nga kahoy nga linubóng sa dutà nahimò nga mga kalág bilang bug-os ginpunggan sang pinabalabag nga dalagkò nga mga kahoy nga sa isá kag isá linansang nga walâ gid pagpasalupa, sanglit iní gamiton nga labáy lamang nga saráng sa ulihe mapangakás. Dalagkò nga mga kable, nga nagkalabit sa tanán nga higád, naghatag sing dagway nga mapag-on kag pagkadakò sa kabilugán, napurongpurongan sa ibabaw sing mga hayahay nga nagkalainlain ang mga duág, naglulotáw nga mga liston kag dalagkò nga pinungpong nga mga bulak kag mga dahon, nga tinuhogtuhog nga may katahúm.
Didto sa ibabaw, sa landong nga ginpauntay sang mga kahoy, mga pinungpong nga bulak kag mga hayahay, nabitay sa mga alambre kag mga kaw-it nga salsalon ang tatlo ka motón nga may tatlo ka aliling, nga sa ila nagkintab nga mga kilid nag-agi ang tatlo ka kable nga dalagkò pa sangsa ibán, kag nagpakabit sang isá ka daku nga bató, nga nakabkabán sa tungâ agúd makahimò sa kinabkab man sa isá ka bato nga natunton na sa kutkot sing diutay nga duóg nga pagatagoan sang maragtas sang kahiwatan sa amó nga adlaw, subong sang mga pamantalàan, mga sinulatán, mga kwarta, mga medalya kag ibán pa, nga ayhan igapaalinton sa malayô kaayo nga mga kabikahan. Ini nga mga kable nagtunton
halín sa ibabaw paidalum, nga naangót sa indì kubós sa kadakô
