nga kalalat-an, mahulog sa kalaglagan, sa mga kusóg sang kinaugali, sa makahalalit nga kamót sang tawo, kag sa ibabaw sang mga
gubâ manubò ang lumot; sa ulihe kon sang panahón dulàon ang
lumot kag ang mga gubâ kag laptahón ang ila abú sa hangin, nga
panason sa mga pamihák sang maragtas ang ila handumanan subong man sang mga nagpatindog, nga sa madugay na nga panahón nadulà sa panumdoman sang katawohan; ayhan, kon ang mga
kabikahan nga natabunan na sang mga inanib sang dutà nalubóng
na ukón nagkaladulà, lamang sa isá ka hinali ang piko sang isá
ka mandudolang nga mapagwâ sa buhi nga bató sang kiráb, saráng makakalkal sa dughan sang bató sang katanhagaan kag sang
mga butang nga tinagò. Ayhan ang mga mangin-alamon sang
pungsod nga nagapuluyô sa sini nga mga kapupod-an magapalangabudlay, katulad sang pagpangabudlay sang mga ehiptólogo
karón kaupod sa mga salin sang isá ka dalagangan nga kaliwatan
nga nagapalibóg sang kaulihìan kag walâ makamutík magatunton
sa iya ang malawig nga kagab-ihon. Ayhan ang isá ka maalam
nga propesor mahambal sa iya mga gintuton-an sing limá ukón
pitó ka tuig sa isa ka pulong nga ginahambal sang tanan nga katawohan: "Mga ginùo! Tun-i kag usisàa ninyo sing maayo ang mga
butang nga inyo makità sa idalum sang aton dutà, kon malubád
ang pilá ka hagyù kag ang pilá ka tinagâ, saráng naton sa walâ
sing maskin anó nga pangalag-ag mahangóp nga ang amó nga mga
butang natuhoy sa panuigon nga sinapat sang tawo, sa dinag-on
sang kadudolman nga sa masamí gintawag naton nga indi halos
mapatihan. Sa kamatùoran mga Ginùo; agúd may malapitlapit
kamó nga paghangóp sang kaawatan sang aton mga nagliligad,
tuman na nga isiling ko sa inyo, nga ang mga nagpangabuhi dirí
indi lamang nga nagkilala pa sang mga hari, kundi agud malubád
ang mga palaligban sang ila pangulohán sa sulód makadto pa silá
didto sa isá ka utbong sang kalibutan, katulad abi sang isiling naton nga, ang isá ka lawas agúd makahulag kinahanglan pa nga
magpamangkot sa ulo nga yadto sa pihák nga bahin sang kalibutan, ayhan sa mga duóg nga karón ginatago sang mga balód.
Ining' indì mapatihan nga kahimtangan nga daw indì mahanabò
sa inyo pag-isip, amó gid man kon talupangdon naton ang mga
nagkahanabò sa amó nga mga tawo, nga halos ko matawag nga
mga tawhanon! Sadto nga mga tinumandok nga panahón, iní nga
mga tawo may tuhoy pa (ukón daw amó ang ila ginpatihan)
nga kaangtanan sa Tagtuga, kay may mga parí silá nga naghalín sa
