kubakoba ang iya dughan. Pumasiplat sia sing isa ka panulok sa
makabululong nga mga kahoy nga didto nagtilindog; nakita niya
ang madalag nga tawo nga nagyaob sa iya sing matinahuron kag
umonay sa iya sing isa ka tion sang iya panulok. Sa iya katingala
iya nakit-an si Elias, nga sa iya isa ka pagpangilay nahangpan niya nga ginapahanumdom sia nahanungod sang iya ginahambal sa
iya sa simbahan.
Sinuot sang kura ang mga panapot sa pagkapari kag sinugdan niya ang palatuntonan: ang pihak sing mata nga sakristan mayor nag-uyat sang libro, kag ang isa ka akolito nag-uyat man sing inogwisik kag sulodlan sing tubig nga bendita. Ang iban, palibot, nagtilindog kag wala sing mga kalu, nagmahipos sila kaayo nga wala’y sapayan nga nagbasa sia sa mahinay nga tingog mahibal-an nga nagkurog ang tingog ni P. Salvi.
Sa karon nabutang na sa sulod sang silindro nga kristal ang tanan nga inogsulod katulad sang mga sinulatan, mga pamantalaan, mga medalya, mga kwarta kag iban pa, nga tinakpan sa sulod sang silindro nga tingga kag sinuldahan.
— Gg. Ibarra, maluyag ka nga ikaw ang magbutang sang kaha sa iya duog? Ginahulat ina sang kura! — Hutik sang Alkalde sa dulonggan sang pamatan-on.
— Sa daku nga kabubut-on, — sabat niya, — apang magalapas ina sang dungganon nga katungdanan sang Gg. Eskribano; ang Gg. Eskribano dapat maghatag sing pamatuod sini nga kahiwatan!
Maligdong nga kinuha sang eskribano ang kaha, nanaog sia sa naalpombrahan nga hagdanan pakadto sa idalum sang kutkot kag sa labing’ mahamuot sinulod niya sa luang sang bato. Hani kinuha sang kura ang bendita kag ginwisikan ang mga bato sang benditadong’ tubig.
Nag-abot ang tion sang tagsatagsa sa pagbutang sing tag-isa ka kandos nga semento sa kadaygan sang takop, nga naghigda sa kutkot, agud nga ang isa mapasigo kag mapakipot sing maayo.
Tinanyag ni Ibarra sa Alkalde ang isa ka palita sang albanyil nga sa iya malapad nga kadaygan nga pilak nagutib ang petsa; apang ang Iya Ekselensya namulongpulong anay sa kinatsila.
“Mga pumoluyo sa S. Diego! — Hambal niya sa maligdong nga tingog. — May kadungganan kami sa pagpangulo sa isa ka palatuntonan nga may isa ka pagkamalahalon nga mahangpan ninyo nga indi na kami magsugid sa inyo. Ginapatindog ang
