tulad sang ginhimò man sang Alkalde apang karón iya nabatián
ang labi nga pamalakpak; sa mga alagád nag-ililóg ang pilá ka
prayle kag si Kpn. Tiago.
Si P. Salvi daw naghulonghulong kon sin-o ang hatagan niya sang inogkandos: nagtulok siá nga daw nagpangduhadoha kay María Clara, apang nagliwát ang iya isip tinanyag niya sa eskribano. Iní, bilang katahurán pumalapit kay María Clara, nga namalibad kag nagyuhóm. Ang mga prayle, ang mga alagád kag ang alpéres nagpalanaóg nga nagsinundanay. Si Kpn. Tiago walâ malimti.
Nakulang si Ibarra, kag buót na mandòán nga ang madalág nga tawo magtunton sang bató, sang madumdomán sang kura ang pamatan-on nga hinambalán niya nga may simbog nga lahóg kag nagpakità sang ila pagkilalaháy:
—Indi nimo pag-ibutang ang imo kandos, Gg. Ibarra?
—Mahimò akó nga si Juan Palomo2, akó ang magisá kag akó man ang makaon! Sabát niya nga may lahóg man.
—Lakát ka! —Siling sang Alkalde nga tinulód siá sing mahinay. — Kon indi, mandòán ko nga indì pag-itunton ang bató kag magadugay kitá dirí tubtob sa adlaw sang paghukóm.
Sa amó ka makahalangawa nga pamahog si Ibarra dapat nga magtuman. Binayluhan niya ang diutay nga pilak nga inogkandos sing isá ka daků nga salsalon, nga pumakadlaw sa pilá ka tawo, kag mahipos nga tumikáng siá sa atubangan. Tinulok siá ni Elías nga may indì mahangpan nga balatyagon; kon tulukon siá saráng masiling nga ang bug-os niya nga kabuhi natingób sa iya mga mata. Tinamdan sang dalág nga tawo ang bukás nga buhò sa iya tiilán.
Sang mapasiplatán ni Ibarra ang bató nga nagkabit sa ibabaw sang iya ulo kag subong man si Elías kag ang dalag nga tawo, nagsilíng siá kay Nyor Juan sa daw nagkurog nga tingog:
—Hatagi akó sing balde kag pangitài akó sing liwan nga inogkandos sa ibabaw!
Ang pamatan-on nabilín nga isá lamang. Si Elías walâ na pagtulok sa iya: ang iya mga matá nalansang sa kamót sang dalág nga tawo, nga nagtamód sa kutkot nagbantay sing maayo sang mga hulag sang pamatan-on.
___________________
(2) Juan Palomo—Ginapahanungod sa mga tawo nga tungod sa lakás nga kabatid, kapin nga pagpaiyaiya ukón sa anó man nga liwan nga kabangdanan, indi magpahanugot sang bulig sang ibán sa iya mga ginahikot ukón mga negosyo, labi na gid kon iya kaugalingon.
