—Isá ka wali nga matahúm, dalagangan! —Siling sang eskribano.
Masanyog, madalum —dugang sang tinugyanán nga manunolat!
—Sa paghambal sing malawig, kinahanglan nga may pulmon ka nga angay sang iya,— hambal man ni P. Manuel Martín.
Walâ sing gindayaw sa iya ang agustino kundi ang iya pulmon lamang.
—Kag ang katanlas sa paghambal,— sugpon ni P. Salví.
—Nakasayod kamo, ng si Gg. Ibarra amó ang labing' maayo nga kosinero sa bug-os nga puód? — Hambal sang Alkalde nga inutód niya ang tinugdàtogdà.
—Inâ ang ginasugid, apang ang iya magayón nga kaingod walâ sing luyag sa pagpadungóg sang paniaga, kay halos nagatiláw sanglinutò,—sabát sang isá sang mga alagád.
Namulá si María Clara.
—Nagapasalamat akó kay Gg.... nagakabalaka siá sing tuman sa akon,— palangurog niya nga may katahap,— apang...
—Apang nagapadungóg man ikaw sing tuman sa imo pagtambong,— hingapos sang maalwan nga Alkalde, kag mag-atubang kay P. Salví.
—Padre Kura, —sugpon niya sa tingog nga matàas,— namutikán ko nga sa bug-os nga adlaw dalayon ka nga mahipos kag nagapanumdom . .
—Ang Gg. Alkalde masipát nga magpanilag! — May katingala nga hambal ni P. Sibyla sa isá ka tuhay nga paningog.
— Amó ang akon batasan,— nagkurog nga sabát sang pransiskano.— Labí nga luyag ko ang magpamati sangsa maghambal.
—Reberensya, luyag mo lamang nga may dag-on ka kag indì maparót!— Hambal nga may lahóg sang alpéres.
Walâ pagbatuna ni P. Salví iní nga isá ka lahóg: ang iya panulok nagsili sing makatión kag sumabát:
—Nakasayod na sing maayo ang Gg. Alpéres nga karón nga mga adlaw indì akó ang labí nga nagadaóg ukón nagakaparót!
Gintabunan sang alpéres ang paitin-itin sing isá ka pinilit nga yuhóm kag naghunâhonà nga indì siá ang gintumod.
—Apang, mga ginùo, walâ akó makahangóp kon ngaa maghambal sang mga daóg kag mga parót,— tugdà sang Alkalde.— Anó ang ihunâhonà sa aton sinang' makaluloyag kag mahipos nga
