kalaot sa ila (Nous n'avous jamais été chez ces peuples que pour
nous y enrichir et pour les calomnier.)
Ang mga alagad nagtulùo nga ang Iya Taslangdon naghambal sing isá ka lahóg kag nagkinadlaw silá sa pagdayaw; ang mga prayle nag-ililóg sa ila sanglit walâ makasayod nga si Voltaire amó ang Voltaire nga sa makapilá ginpakalaot nila kag binutáng sa impyerno. Apang si P. Sibyla nakahambal sinâ kag nagpalibóg, nga naghangóp nga ang Alkalde nakahambal sing isá ka butáng batok sa pagtuluohan.
Sa isá ka kiosko nagakinaon ang kabataan, nga ginapangulohan sang ila manunudlò. Agúd silá mangín-kabataan nga pilipinhon naghimò silá sing tuman nga ginahod, nga sa masunson sa latók kag sa atubangan sang ibán nga mga tawo nagauluklò sangsa magtampad. Amó iní, nga nagsayóp silá sa paggamit sang mga kubyertos ginsabdong sang kaingod; gikan diri nagsugod ang isá ka baisáy kag silá nga duhá nakakità sing mga umalapin: ang ibán masilíng nga kutsara, ang ibán tenedor ukón kutsilyo, kag sanglit walâ sing isá nga mabilang nga nakahibaló, nagtuháw ang panga- tarungan nga ang Diwa amó si Cristo ukón, sa maathag pa gid, isá ka baisáy sang mga teólogo.
Ang mga amáy nagpinangilayay, nagsinikulay, naghinaghòay kag sa ila mga yuhóm saráng mabasa nga malipayon silá.
—Nián!— Siling sang isá ka umanhon nga babae sa isá ka tigulang nga lalaki nga nagdukdok sang malam-on sa iya dulukdokan,— bisán indì luyag sang akon bana, si Andoy ko mahimò gid nga pari. Kamí matùod mga imol, apang magapangabudlay kami kag kon kinahanglan, mangayò kami sing mga limós. Indì madulà ang mahatag sing kwarta agúd ang mga imól saráng man maordenán. Walâ balá nagahambal si Utod Mateo, tawo nga wala pagbutíg, nga si Papa Sixto isá anay ka bakero sang mga karabaw sa Batangas? Kay tan-awá balá ninyo si Andoy ko, tuloka siá kon walâ balá siá sing nawóng ni Sn. Vicente!
Kag nagalaway ang bàbà sang but-anan nga ilóy sa pagtan-aw sang iya anák nga mauyat sang tenedor sa duhá ka kamót.
—Buligan kitá sang Diwa! — Sugpon sang tigulang nga nagusang sang minamâ. — Kon si Andoy mahimò nga Papa, makadto kitá sa Roma, hehe! Makalakát pa man akó sing maayo, kag kon mapatay akó . . . hehe!
