—Ayaw ka magpalibóg, lolo! Si Andoy indì malimot nga. gintudlòán mo siá sa paglala sang mga alát nga kawayan kag mga likín.
—May katarungan ka, Petra; akó nagapati man nga ang imo anák mangín-dakú nga butáng... sa kubós na gid mangin-patriarka. Walâ akó sing nakità nga ibán nga sa diutay nga panahón nahibal-an na niya ang hilikutón! Madumdomán na niya akó kon siá Papa ukón obispo mapalingáw siá sa pagpanghimò sing mga alat nga ihatag niya sa iya kosinera. Mahatag na siá sing mga misa nga ihalad sa akon kalág, hehe-e-e-e!
Kag ang but-anan nga tigulang nga lalaki, nga nagbatyag siní nga paglaum, pinunô niya sa pagsulód ang iya dulukdokan sing madamò nga buyò.
—Kon pamatian sang Diwa ang akon mga pangamuyò kag matuman ang akon mga ginalauman, masilíng akó kay Andoy: Anák, hugasi kami sang amon mga salâ kag ipadalá kamí sa langit. Indi na kami kinahanglan nga magpangadî, magpuasa, bisán magbakál sing mga indulhensya. Kon sin-o ang may anák nga Santo Papa saráng na makahimò sing mga salâ!
—Pakadtoá siá sa balay, Petra, —silíng sang tigulang nga nahakunyag. —Tudiòán ko siá sang paglala sang nitò!
—Hmm! Abá! Anó ang ginahunâhonà mo, lolo? Nagahunâhonà ka nga ang mga Papa nagahulag pa sang ila mga kamót? Ang kura, nga siá isá lamang ka kura, pagpangabudlay lamang sa misa... kon siá maglisûlisò!' Ang arsobispo walâ na iya paglisûlisò, nagahiwat sing misa nga nagapungkò; labí pa gid ang Papa ang Papa sing iya . . . ang Papa nagahiwat sinâ sa hiligdáan, nga ginaabanikohan pa! Anó ang imo ginhunâhonà?
—Indì kapin sa kinahanglanon Petra, nga mag-alam siá sa paglala sang nitò. Maayo kay makabaligyà siá sing mga sadók kag mga pitaka agúd indi siá magpangayò sing mga limós katulad sang ginahimò dirí sa tanán nga tuig sang kura sa ngalan sang Papa. Nalùoy gid akó magtan-aw sang isá ka santos nga imol kag ginahatag ko ang tanan ko nga sinuptan.
Nagpalapit ang isá man ka umanhon nga nagsilíng:
—Pat-od na gid, kumare, nga ang akon anák mahimò nga doktor; walâ na sing katulad ang mangín-doktor!
—Doktor! Paghipos, kumpare, sabát ni Petra.— Walâ sing angay ang mangin-kura!
