INDI SILA MAAYUAYO kag wala mapunihi sing maayo nga mga pamatan-on nga babae nga makabuyok sang igtalupangod sang tanan, lakip kay Fray Sibyla; indi ang Iya Taslangdon nga Kapitan Heneral kaupod sang iya mga ayudante agud ang tenyente matapungawan sa iya dalamguhanon, nagpalapit sing pila ka tikang, kag si Fray Damaso nahimo nga daw inudom: sia isa lamang ka tawo nga taglawas sang nalaragway nga nagprak, nga nag-uyat sang kamot sang isa ka pamatan-on nga nagpanapot sang lunsay itum nga nagluto.
— Maayong’ gab-i, mga ginuo! Maayong’ gab-i, Padre! — amo ang nahauna nga namitlang ni Kapitan Tiago nga naghalok sa mga kamot sang mga pari nga nagkalalipat sa paghatag sa iya sing bendisyon. Kinuha sang dominiko ang iya tagusilang sa pagtan-aw sang pamatan-on nga bag-o lamang magsampot, kag si Fray Damaso nangluspi kag humitad ang iya mga mata.
— Isa ko ka dungog ang magpakilala sa inyo kay Don Crisostomo Ibarra, anak sang akon abyan nga napatay!—Padayon ni Kapitan Tiago. — Sia bag-o lamang makaabot gikan sa Europa kag gin-alaw-alaw ko sia.
Sang pagsambit sini nga ngalan may mga panghalawhaw nga nabatian: ang tenyente nalimot sa paghatag sing katahuran sa tagbalay, pumalapit sia sa pamatan-on kag ginhimutaran niya halin sa tiil rubtob sa ulo. Hanti, ini, nagpakigbayluhanay sing pangabiabi sa bilog nga guban; daw wala sing katingalahan nga makita sa iya Iwas lamang sang itum niya nga panapot nga yara sia sa tunga sang amo nga kadak-an. Ang iya maayo nga panindog, ang iya pangguyahon, ang iya mga panghulag nag-alisbong, wala’y sapayan, sina’ng kaamyon sang isa ka mahinlo nga pagkalanubo nga ang lawas subong sang kalag ginpahib-ong sing alangay. Mabasa sa iya pangguyahon, talunghayag kag malipayon, ang pila ka tagdiutay nga agi sang dugo nga katsila nga naggataw sa iya mata-
