hukóm, nakità ninyo ang inyo tigulang nga amáy nga nagpuláw
sa pagpangabudlay nahanungód sa inyo, nga nagpahilayô sa inyo
sa kaayuhan man ninyo, napatay sa kalisód sa isá ka bilanggòan,
nga nagbalakhùon sa handum nga makahakós lamang sa inyo, nga
nagpaingtà sang isá ka tinuga nga makalipay sa iya, nga isá lamang, masakitón samtang kamo didto sa ibán nga kadutàan...
Makabati kamó sa ulihe nga ginapakahuy-an ang iya ngalan, nakita ninyo ang iya linubngan nga walâ unód sang maluyag kamó
maghalad sing pangamuyo nahanungód sa iya? Walâ? Nagahipos kamó, sa ulihe kondenahón ninyo siá!
Binatak niya ang iya butkon, apang ang isá ka pamatan-on nga babáe, maabtik katulad sang silak, pumatongâ kag sa iya mahinhin nga mga kamót pinunggan niya ang butkon nga may dumót: siá amó si María Clara.
Tinulok siá ni Ibarra sing isá ka panulok nga katulad sang iya sang buang. Amát-amát humogák ang nagpanagingting nga mga tudlò sang iya mga kamót nga pinabay-an niya nga nahulog ang lawas sang pransiskano kag ang kutsilyo, kag tinabunan niya ang iya guyá nalagyo siá nga lumusót sa kadam-an.
