— Sang pila ka bulan sang makataliwan na ikaw, sumugod ang paglainay nila ni P. Damaso, nga indi ko masaysay kon ano gid ang matuod nga kabangdanan. Ginsumbong sia ni Fr. Damaso nga wala pagkompesar: sadto wala man sia pagkompcsar, kag wala’y sapayan mag-abyan kaayo man sila gihapon, nga madumdoman pa nimo. Labot pa, si D. Rafael isa ka tawo nga tuman ka dungganon kag labi katarong sangsa madamb nga nagkompesar sing masunson: may kaugalingon sia nga pagbinatasan nga tuman katadlong kag masami makahambal sia sa akon kon magpanugilanon sia nahanungod sang amo nga pagdisgustohanay: — Gg. Guevara, nagapati ka nga patawaron sang Dios ang isa ka sala, ang isa nga nakapatay halimbawa, nga isugid lamang sa isa ka pari, tawo nga amo ang may katungdanan sa paghipos nahanungod sina, kag sa pagkahadlok nga sunugon sa impyerno nga amo ang buhat sa pagpakasakit? Sa pagpakatalaw kag sa pagpakahuya sing hipos? May liwan ako nga paghangop sa Dios, — siling niya, — kon sa akon lamang, indi gayod matadlong ang malain sang isa ka malain, bisan mapatawad sa wala’y kahulogan nga mga paghaya, bisan sa mga paglimos sa Simbahan. — Kag hinatagan niya ako sini nga pananglitan:—Kon ako nakapatay sang isa ka amay sang panimalay, kon ginhimo ko ang isa ka babae nga isa ka balo nga masulub-on kag ang pila ka malipayon nga kabataan, mga ilo nga pinabayaan, makontentar ko ayhan ang Makagagahum nga indi ako pagbitayon, nga itugyan ko ang akon likum sa isa nga amo ang magtago, sa paghatag limos sa mga pari nga wala gid nagakinahanglan, sa pagbakal sing bula sa paghinulsol4 ukon sa pagtangis adlaw kag gab-i? Kag ang balo kag mga ilo? Ang akon ipalatugsiling nagahutik sa akon nga dapat ko tal-usan kon mahimb ang tawo nga akon ginpatay, ihalad ko ang tanan sa sulod sang akon kinabuhi sa kaayuhan sang panimalay nga ginhatagan ko sing masubo nga kapalaran, kag bisan pa sina, sin-o ang makailis sang paghigugma sang isa ka bana kag isa ka amay? — Amo ini ang pagpangatarungan sang imo amay kag ini nga pamatasan amo ang iya gindala sa gihapon kag sarang masiling nga wala sia sing nahimo nga malain bisan kay sin-o; sa baylo, gintinguhaan niya sa pagpanas sa maayo nga mga binuhatan ang pila ka kalainan nga suno sa iya ginhimo sang iya mga katigulangan. Apang ibalik naton sa paglainay nila sang pari, ini nagtama na gid kalubha.
(4) Bula sa paghinulsol — Kalig-unan ukon mandu sang Papa nga tungod sina ginapatawad kag ginahusay ang tanan, bulong bilang sang maskin ano nga kasakitan.
