ubos sang ila sag-ang, may isa ka mabug-at nga rosaryo sa tagsa
nila ka kamot, nga nagpakita nga daw nagpangadi agud palakton
sila sang mga soldado nga hilway. Sang makita nila nga sarang
sila makalakat nga indi pagluthangon, nagsugod man sa paglalakat ang mga lalaki, nga may kaaslum sa ila buot; sa nahauna,
ang ila paglakatlakat ginlatiran nila tubtob lamang sa atubangan
sang ila balay, nga ila ginhiluthilot ang ila manok; sang ulihe
gintilawan nila nga magpalaytilayo, nga nagdulogdulog, kag sa
sini nakalambot sila sa atubangan sang tribunal.
Sang pagligad sang napulo kag lima ka minuto naglibot ang iban nga mga sugilanon. Kuno si Ibarra kag ang iya mga suloguon may tuyo sa pagkawat kay Maria Clara, kag inapihan ini ni Kapitan Tiago, nga ginbuligan sang mga gwardya sibil.
Ang kadamuon sang mga patay indi na kay napulo kag apat, kundi katloan; si kapitan Tiago napilasan kag naglakat sa amo man nga adlaw pati sang iya panimalay sa Manila. Ang pag-abot sang duha ka kwadrilyero, nga ila gindul-ong sa isa ka liyaliya ang isa ka dagway sang tawo, kag ginsunod sang isa ka kwardya sibil, nagtuga sing isa ka kahangawa. Hunahona nila nga naghalin sa kombento; sa dagway sang mga tiil nga nagtunton, ang isa nagpakutpakot kon sin-o yadto; sa malayulayo ginsiling nga amo sia; sang malayo na ang patay ginpilupiloan nila ang kadamuon kag naathagan ang katanhagaan sang Santisima Trinidad; sang ulihe sinulit nila ang milagro sang mga pandisal kag mga isda, kag ang mga patay nahimo na nga katloan kag walo.
Sang ikapito kag tunga ang takna sang pag-alabot sang iban nga mga gwardya sibil, nga naghalalin sa mga banwa nga kaingod, ang sugilanon nga naglibot maathag na kag may kapat-uran.
—Bag-o lang ako maghalin sa tribunal diin nakita ko nga nabilanggo sanday Don Filipo kag Don Crisostomo, — siling sang isa ka tawo kay utod Puti. — Nakasugilanon ako sa isa sang mga kwadrilyero nga nagabantay. Si Bruno, ang anak sadto’ng napatay sa hanot, amo ang nagsugid sang tanan kagab-i. Nahibal-an na nimo, nga ipakasal ni kapitan Tiago ang iya anak nga babae sa pamatan-on nga katsila; si Don Crisostomo, nga nahuy-an, buot magtimalos kag tuyo niya kuntani patyon ang tanan nga katsila, pati ang kura; kagab-i sinulod nila ang kwartel kag ang kombento; kag maayo nga palad, nga sa kaluoy sang Diwa, ang kura didto
