SI MARÍA CLARA NAGPAKASÁL511
batok sa Pangulohán, kag nga ginkilala niya nga iya, indi makità
sa iya kon sa anó siá isumbong.
—Kag ang pahayag sang tulisán sang walâ pa mapatay?
—Ginapatáy inâ sang tag-apin, kay, sunô sa amó man nga tulisán, silá walâ gid makapakighangóp sa pamatan-on, kundi sa isá lamang nga gintawag kay Lucas, nga isá niya ka kaaway sunô sa saráng mapamatud-an, kag nga naghikog, ayhan tungod sa mga paghinulsol. Napamatud-an nga ang mga papel nga nasapwan sa bangkay mga ginhimûhimò lamang, ang tigbató kaangay sang iya ni Gg. Ibarra sang pitó ka tuig nga nagligad, apang indì sa karón, nga amó ang nagpapati nga ang huwaran amó iní nga sulát nga nagapakasalâ. Labot pa, ang tag-apin nagsilíng, nga kon indì luyag kilalahon ni Gg. Ibarra ang sulát, madamò ang mahimò nahanu- ngód sa iya; apang sang makita niya ang sulát nangluspad siá, na- dulàan siá sing pangalibutan kag ginpamatud-an niya ang tanan nga iya nasulát didto.
—Nagsilíng ka, — pamangkot sang isá ka pransiskano, nga ginpadala ang sulát sa isá ka babáe, paano nga nakakadto sa kamót sang piskal?
Ang tenyente walâ magsabát; tinulok niya anay sing makadali si P. Salví kag humalín, nga nagkulurog nga hinilók niya ang mataliwis nga utbong sang iya abuabuhon nga bungot, samtang ang iban naghinambalhambal.
—Dirâ makità ang kamot sang Diwa! —Silíng sang isá. Patí ang mga babáe naakig sa iya.
—Sinunog niya ang iya baláy nga nagtùo nga malwás siá, apang walâ siá makaisip sang isá ka kalumon, nga amó, ang inday- inday... ang babae. sugpon sang isá nga nagkadlaw. Pagbuót sang Diwa! Santiago cierra España!(4)
Sa karón ang tigulang nga militar nagdulog sa iya pagtikang- tikang kag pinalapitán niya si María Clara, nga namatì sang sinugilanon, nga walâ paghulag sa iya pulungkòan: sa iya tiilán makità ang mga bulak.
—Ikaw, isá ka pamatan-on nga tuman ka mahinalungon, — hambal sa iya sang tigulang nga tenyente sing mahinay. — Maayo
ang imo ginhimò nga ginhatag nimo ang sulát... sa sina masaligan ninyo ang isa ka malinóng nga palaabuton.
______________
(4) Santiago cierra España - Singgit sa inaway sang mga katsila.
