SI MARÍA CLARA NAGPAKASÁL515
ang akon man amáy amó ang magpatawad sa imo sang halit
nga ginhimo nimo sa iya!
Si Ibarra umisol kag tumulok nga may katingala sa dalaga.
—Huo, — padayon niya, — ang tawo nagsiling sa akon nga indi mapahanugot ang aton pag-asawaháy, kay ang iya ipalatugsiling magasikway sinâ, kag mapilitán siá sa pagbantalà, sa katalagman nga bangdanan sang isá ka dakû nga kahuloy-an, kay ang akon amáy amo si...
Kag hinutík niya sa dulonggan sang pamatan-on ang isá ka ngalan sing tuman kahinay nga ang ginhutikán amó lamang ang nakabatî.
—Anó ang akon sadto mahimo? Dapat ko ihalad sa akon gugma ang handumanan sang akon ilóy, ang dungóg sang akon indì tunay nga amáy kag ang maayo nga ngalan sang tunay? Mahimò ko inâ nga ikaw man indi makatamay sa akon?
—Apang, mga pamatùod, may mga pamatùod ka? Kinahanglan nimo ang mga pamatùod! — Hambal ni Crisostomo nga nagpalangurog sa kakugmat.
Kinuhà sang dalaga sa iya dughan ang duhá ka papel.
—Duhá ka sulát sang akon ilóy, duhá ka sulát nga hinimò niya sa tungâ sang iya mga paghinulsol, sang ginmabdos pa lamang niya akó! Kuhàa, basaha kag makità nimo kon anó ang pagpakalàot niya sa akon kag pagpangayo sang akon kamatayon... ang akon man amáy amó ang magpatawad sa imo sang halit mga bulóng! Iní nga mga sulát nalimtan sang akon amáy sa baláy diín siá nagpuyô, nakità inâ sang tawo kag iya gintagò, kag ginhatag niya lamang sa akon nga ginbaylo sang imo sulát... sa pagpasalig, sunô sa iya, nga indì akó magpakasál sa imo nga walâ sing pahanugot ang akon amáy. Kutob nga gindalá ko inâ sa akon dughan, sa baylo sang imo sulát, binatyag ko ang kayamî sa akon tagipusuon. Pinaiway ko ikaw, pinaiway ko ang akon gugma... anó ang indí mahimò sang isá ka babáe sa isá ka ilóy nga napatay kag duhá ka nagakabuhi nga amáy? Namutikán ko balá kon sa anó nila gamiton ang imo sulát?
Naurongán si Ibarra. Si María Clara nagpadayon:
― Anó pa ang nabilín sa akon? Masugid ko ayhan sadto sa imo kon sin-o ang akón amáy, masiling ko balá sa imo nga mangayò ka sa iya sing patawad, sa iya nga naghatag man sing daků
