526NOLI ME TÁNGERE
Nabatián ang pilá ka sininggit, kag sa madalî sa uloantad naggwâ ang ulo sang pamatan-on sa pagginhawa, kag sumalop na man.
—Adto, adto siá! —Sininggit sang pilá ka tingeg kag nanihól na man ang mga bala.
Ang bote kag ang baroto naglagás sa iya: diutay lamang nga alimbukád ang nagpakilala sang iya ginlanguyán, nga nagpalayô sing amát-amát sa baroto ni Ibarra, nga naglutáw katulad sang binayàan. Tagsa nga magbutwà ang manlalangoy sa pagginhawa, nagluthang sa iya ang mga gwardya sibil kag mga tinawo sang bote.
Ang paglagás nagdugay; ang baroto ni Ibarra malayo na, ang manlalangoy naghilapít na sa higád, nga may antad nga mga kalim-an ka dupá. Ang mga manogbugsay kinutóy na, apang si Elías nalapyò man, kay masakò nga nagbulubotwà siá kag sa tagsa ka pagbutwa nagkalainlain ang iya padulongan nga daw sa pagpatalang sa iya mga manoglagás. Walâ na pagpakità ang malubhà nga alimbukad sang agi sang manogsalum. Sa katapusan nga tión nakità nila siá nga malapít sa higád sing mga napulò ka dupá, pinalukpan nila... sang ulihe nagligad ang mga tinìón kag mga tinìón; walâ na sing naggwâ liwát sa ibabaw sang malinong kag binayàan nga kadaygan sang linaw.
Sang pagligad sang tunga sa taknà sang ulihe, ang isá ka manogbugsay nagsugid nga kunó nakità niya sa tubig, malapít sa higád ang mga tiliman-an sang dugô, apang ang iya mga kaupdanan naglungôlungo sa isá ka hagyù nga daw sa masilíng nga huo kag indì.
