sesyon, sa mga balaligyàan sang mga insik, kag sa idalum sang kalù kag sa sulod sang prak si Kapitán Tiago nabasâ sang balhas sa
pagkulukompas sang baston nga may pinungpong nga suklà,9 nga
iya ginkulokaayo kag bulobungkagon man sa isá ka paghikot nga
matahúm kaayo kag sa isá ka kaligdong nga labi pa gid katahúm.
Tungód sini ang mga punòan nagbilang sa iya nga isá ka tawo
nga maayo, nga may maayo nga kabubut-on, mahidaiton, matinahuron, mapinatihon, mainamumahon, nga walâ pagbasa sang maskin ano nga tulon-an ukon pamantalaan halin sa España bisán
nga maayo man siá maghambal sang kinatsilâ; gintulok nila siá
sa balatyagon nga katulad sang pagtulok sang isá ka tumolùon
sang nataís na ang takón sang iya daán nga sapatos, nga bangián
salamat sa iya ugali nga panikáng. Sa iya, may kamatùoran
ang duhá ka hurubaton nga kristohanon kag ang ila sang mga
dimatinuohon nga beati pauperes spiritu10 kag beati possidentes kag labí nga maayo kon sa iya sarang magamit inâ, nga sunô sa
ibán, sayóp nga lubád gikan sa griego: (Kahimahayàan sa Diwa
sa kahitaasan kag paghidait sa mga tawo nga may maayo nga
kabubut-on sa duta!) Kay makità naton sa ulihe, indì tuman nga
ang mga tawo may maayo lamang nga kabubut-on agúd mabuhì
sa paghidait. Ang mga dimatinuohon nagbilang sa iya nga isá ka
buángboáng, ang mga imol isá siá nga walâ pagtúo, mapintas,
manoghimulós sang kapiutón, kag ang mga kubós sa iya isá siá
ka malupigon kag madinaugdaugon. Kag ang kababaen-an? A!
Ang kababaen-an! Mga hinutikhotik nga mabinutangbutangon sa
sulód sang makaluluoy nga mga baláy nga nipà kag mapasalig nga
mabatìán ang mga panaghoy, mga hibubun-ot, nga ginsaktan kon
kis-a sang matagsing nga hibî sang isá ka lapsag. Kapín sa isá
ka pamatan-on nga babae ang gintudlo sa bagay nga ginduhadohaan sang mga kasilingan: siá may maaslum nga panulok kag
huyós na nga pamayhon. Apang ini nga mga butang walâ pagkuhà sang iya katulugon, walâ sing isá ka pamatan-on nga babáe
nga nag-ukay sang iya kalinóng; isá ka Tigulang nga babae ang
nagpaantos sa iya, isá ka tigulang nga babae nga nagpakig-indis
(9) Baston nga may pinungpong nga sukla— "Baston de borlas" sa kinatsila, nga timaan sang kagamhanan sa Filipinas; isá ka baston nga may uloyatán nga bulawan, may pinungpong kag lubid nga sukla nga bulawanon,
(10) Beati pauperes spiritu — Linatin nga hambal: Ginabugayan ang mga may kubós nga inoghalangop kag amó ang nahauná nga mga tinaga sa Wali sa Bukid, Beati possidentes. —Linatin man nga hambal: Malipayon ang mga may maayo nga inaghalangop.
