LAMHARON PA SADTO ang aga sang magsimba sanday Tiyà Isabel kag María Clara: iní nagpanapót sing matahúm, nga may isá ka rosaryo nga may mga binantok nga asul nga amó bilang ang iya pulseras, kag ang isá nga may tagusilang sa pagbasa sang iya "Angkla sang Salvacion" sa tión sang Balaan nga Pagkalawat.
Halos nga nakataliwan ang parì gikan sa altar, ang lin-ay nagpakità na sang iya luyag sa pagpauli sa daku nga katingala kag kalain sang buót sang maayo nga tiyà nga nagtuo nga ang iya hinablos matinùohon kag palapangadi, katulad man sang isá ka mongha. Nagkumod kag nangurós tumindog ang but-anan nga tigulang.—Abá! Patawaron siá sang maayo nga Diwa, nga dapat makakilala sang tagipusuon sang mga lanubò nga babae labí sang sa imo, tiyà Isabel, —amó kuntani ang ihambal niya sa iya sa pagpugóng sang iya mga matigdas, apang iluynon nga mga laygay.
Karón, nakapamahaw na silá kag si María Clara lumingáw sang iya kataká sa paggansilyo sang isá ka bulobolsa nga suklà, samtang ang iya tiyà buót magpanas sang mga agi sang nagligad nga badù, nga ginsugdan niya ang pag-uyat sang plumero. Si Kapitán Tiago sumosi kag bumasa liwát sang pilá ka papel.
Ang tagsa ka gahod sa dalan, ang tagsa ka salakyan nga nag-agi nagpakubákobá sang dughan sang lin-ay kag nagpakurog sa iya. A, nián naghandum siá sa pagbalik liwát sa iya malinóng nga beateryo, (puloy-an sang mga mongha), sa luyó sang iya mga abyan nga kababaen-an! Didto saráng siá makapakigkità sa iya nga indì iní magpalangurog, nga indì matublag! Apang, indi balá siá abyan nimo kutob sang ikaw batà pa, walâ balá kamó maghampang sang binuang kag tubtob nga nagkamog pa kamó kon kis-a? Ang kabangdanan sini nga mga butáng indì nakon pag-isugid; kon ikaw nga nagabasa sa akon nakahigugma, ma-
(1) Angkla sang Salvación— Isa ka tulon-an sa misa kag sa pagtuo.
